الشوافة: أشكون تما تاني، وا زيد بلا ما تمتم و ضفي علي البورطابل راه جنوني ما كيحملوهش مصطفى العلوي: أسيني أشريفة الله يهديك راه غير و كان واحد الضيف ديال البرنامج خاص نقاد معاه شي أمور الشوافة: واسير تفاهم وقاد داكشي معاهم فداركم عاد أجي لعندي أنا، و ما زيان و الله تا مزيان على أخر يامي نبقى نساين واحد تا يسالي التيلفون مصطفى العلوي: ها هو أللة ضفيتو غير تهدني شوية، ما تعصبيش ما يكون غير خاطر الشوافة: وليني جبها عندك السي مصطفى، مترش لنا ودننا فديك التلفازة بديك، جموع خارجة من كل حدب و صوب شباب و نساء رجال و شيوخ اليوم في الشارع من أجل الوطن من أجل قافلة التنمية، و زايدها عندي تا هنايا بالتيلفون، و جمع الكعدة و عرف معامن راك أمعلم، راه أنا ماشي ضيفة عندك فداك السوق اللي تا دير كل سيمانة مصطفى العلوي: وخا أللة راه قالو لي عليك مجهدا و صعيبة و أنا جاي اليوم عندك، غير على هاد القضية راه الناس سفطوني ليك. الشوافة: زيد زيد أديناصور التلفزة المغربية أش باغي و أش جابك لعندي مصطفى العلوي: أودي أش غا نقوليك أشريفة، من نهار أنا كاين المغاربة كا يبغوني و كا يعجبهم داكشي اللي كا ندير، غير و كان مؤخرا داك البرنامج ديالي حوار، ما بقاش عندو بزاف المشاهدين و نقصوا على الأول، و هادشي ما فهمتش علاش، و تا الأخبار اللي كنت محيح فيها ما بقيتش تا نديرها و تا دوك التدشينات ديال الملك ما بقاوش تا يدوزوا على المباشر، و أنا نهار مور النهار كا ينقص الجمهور ديالي و العشاق ديالي، و هادا ما خلاني اليوم نقصدك و المقصود الله أشريفة. الشوافة: ناري على سلوكية طلقتي أشريف، شوف نقول ليك باش تعرف، راه لمغاربة معمرهم بغاوك و ما عمر شي حد عجبوا داكشي اللي كا دير، و كلما كانو كا يشوفوك، كا يقولو ها هو تاني غا يبدا يبحلط علينا، و هادشي عادي أشريف حيت أصلا أنت ما عمرك درتي شي حاجة، هي هاديك، و زدتي كملتها و جملتها بداك البرنامج اللي سميتو حوار، كا تجيب فيه دوك الديناصورات بحالك و تتبقاو تما طالقين الشافوي على لمغاربة، و أنت زعما تا دير فيها بطل و كا تزمتهم و هي كلها مسرحية واجدة و موجودة، كتمثلها معاهم، وشاد ليا غير في الناس الظريفين أما لقبا كاع ما تقد لهم، كيخرجوا ليك عينك. المهم من هادشي كولو أسي مصطفى لمغاربة و لاو باغيين المعقول و غير العقول، أما داك التخربيق ديالك عاقوا بيه و كرهوه و ملوه أشريف، و إما دير شي حاجة مقادة و لا نوض من تما و تكعد من ديك التلفزة. و كاين حل تقدر تجربوا أسي العلوي، هو تقلبها من البرامج السياسية و دير معلق رياضي، على الكولف و لا على الفروسية تجي معاك، أما حتى الكورة راه صعيبة شوية عليك، أو كاين الحل الثاني تا هو زوين، دير ليك شي محال تبيع فيه التصاور ديال الشخصيات اللي جبتي عندك لبرنامج و هما كا يديرو الماكياج، راه يتمشاو ليك بالمزيان و الله القسم مصطفى العلوي: والو زعما ما كيان تا شي لعيبة أخرى من غير هاد الجوج، شوفلي شي حل أخر نديروا إكون شوية فيه الضوء على هادو الشوافة: والو أشريف و الله ما نخبع عليك، راك غالي و ماشي رخيص، لوكان كانت شي حاجة أخرى ندبر على خويا باللي كان مصطفى العلوي: واخة أللة واخة أللة، ياله الله إعاونك مرة أخرى الشوافة: و الشريف فين غادي وا حط الباروك، راه ماشي حوار هذا مصطفى العلوي: أه نسيت غير سمحي ليا ها هو ما يعاودش الشوافة: سير سير بشي تكركيبة فالدروج يا مصطفى يا ولد العلوي، تهنينة من كمارتك تا أنت
