تعايش….

ماكنصوتوش فالانتخابات ماشي حيت حنا لاسامح الله ماشي وطنيين ولا حنا حزب الكنبة كما كيقولو ..ولا حيت معندناش مع الخوانجية الافاقين،ولا مع اليساريين المساطيل ولا الليبيرالين الهرارفة ..وماشي حيت حنا معندناش لا إيستماح الله ميولات سياسوية ولا مكناش كنخرجو الشبكة ديال ابو سلمى فالصغر …ولا الله يستر مكناش كنعتبرو الشهيد المهدي بن بركة سيعود من المنفى ليكشف القتلة ويزج بأوفقير في السجن المدني سنة 2001 …..لا لا لا ابدا والله … حنا مكنصوتوش فالاستحقاقات حيت عارفين الماليك هو صوتنا الوحيد ،وهو الشخص لي كيدير داكشي لي كيخصو يدار وكيقصم علينا داكشي لي قصم الله بالقوسطاس الموبيل .. وكينظم الفرقاء السياسيين بيدو وكيتبع مع الجيش والبوليس والدرك والقوات المساعدة …وحتى فريق الجيش الملكي بيدو، كيفرق المساعدات وكيكفن ضحايا حوادث السير.. ويعين رئيس الحكومة ويبهدل رئيس الحكومة ويشكل المعارضة ويبهدل المعارضة ..ويشرف على طلب الغيث وتسليم كأس العرش واحياء ليلة القدر.. ويغضب على المسؤولين الامنيين بيده وحتى برجله احيانا حفظه الله .. ويدشن كل شيء بداية من اصغر يد مهراز فيك يا بلد ، الى اكبر مفاعل ديال الطاقة الريحية فيكي يا مصر .. ويحفظ التنوع في اطار الحكامة الجيدة ،فتجدنا بفضله نعيش مع السلفيين والبودشيشيين والسنافر ووالمساطيل والكلاماريين ولا لعسكرة الريف الديماشقي، والفيسبوكيين الباسلين، والطحالب واتحاد كتاب المغرب ولبنى ابيدار والرفيق الاستاز الياس العماري في وئام تام لا تشوبوهو شائبة ولا تضاهيه اعتى ديموكراطياتك يا عالم، ودائما في اطار الحكامة الجيدة والتعايش " السلبي" المشترك … لا غالب ولا مغلوب بيننا.. نشتري الطاسة وندخل للمسجد ونسرق باعتدال … صحيح هناك من يسرق بشراهة لكن دائما في اطار الحكامة الجيدة !! وعموما اي سرقة زائدة على القانون غادي تحتل ليهم فالركابي يوم ليقاقي الله- هاحنا تعادل -.. إوا علاش غادي نمشيو نصوتو علاااااش اذا كان اقصى ما يمكن ان نفعله بتصويتنا ونحن الشعب المحساد المغيار هو اننا نصوتو على 400 سرسوخ وسرسوخة باش يشدو خمسة ديال الارانب فالشهر.. وهم بدورهم يجتامعو ويصوتو في النهاية على "سلطعون "….!!! حبيبي يا سلطع
حصصيلتكم في النهاية هي سلطعون سواء صوتي ام لم تصوتي يا انشراح … يلا ضربو الطم وخليونا نركزو مع الأوسود لعل الله يجعل من بعد امرنا هذا فرجا …