جميل انو الفنان يتضامن من القضايا العالمية ! و لكن راه حنا براسنا خاص لي يتضامن معانا ! راه هاداك الدري السوري لي مات كان لابس تريكو و دجين حنا راه مازال عندنا الدراري مالاقينش الكرصون ! آ ختي لطيفة !‎

جميل انو الفنان المغربي يكون عارف شنو واقع فالعالم و جميل انو يتضامن مع قضايا انسانية باعتبار الفنان كايبقا سفير ديال بلادو قدام البلدان و باعتبار الفنان عندو معجبين و متتبعين كايديرو داكشي لي دار و سائرون على نهجه ! تضامن الفنانين مع القضايا الانسانية كاين بشكل كبير فاوروبا و امريكا انجلينا جولي كمثال السيدة سفيرة للنوايا الحسنة و عندها اهتمام بقضايا كبيرة كاتهم المرأة والطفل عبر العالم ، ماخلات فين سافرات و جمعات الفلوس للاطفال ضحايا الحروب فافريقيا و للنساء المضطهدات عبر العالم! شاكيرا دارت منظمة انسانية ديالها كاتبني مدارس فكولومبيا باش تقري الدراري لي ماعندهمش! مادونا كانت من بين الاوائل لي ساندو مرضى السيدا في العالم و جمعات التبرعات و الفلوس و ساهمات بشكل كبير في التعريف بهاد المرض ! كلهم نساء فنانات استغلو الصورة ديالهم و الشهرة لخدمة قضايا انسانية كبيرة يمكن تخلي سمياتهم يتحفرو فالتاريخ و هادشي مزيان بزاف.
الفنان الحقيقي كايبقا واحد الانسان مرهف الاحاسيس لي يمكن يتفاعل مع قضايا انسانية بواحد الشكل مختلف على الناس العاديين و يتبناهم حيت كايشوف راسو عندو الامكانيات باش يعاون علاش لا؟ من جهة الناس كايستافدو و من جهة اخرى هو كايستافد حيت مساعدة الآخر كاتعطي للانسان واحد الاحساس انو مهم فالحياه و انو مصير بزاف د الناس متعلق بيه و هادشي كايخليه يحقق واحد الاكتفاء نفسي …
هادشي كلو مزيان ! غي هو مؤخرا الفنانة لطيفة احرار دارت واحد المبادرة و خرجات فالتلفزة كاتبكي و تنحط على داك الطفل السوري لي لاحو البحر فتركيا ! و بينولينا تصاور ديال مجموعة ديال الناس لابسين تريكو حمر و سروال دجين و مشبحين حدا الكشكوشة زعما تضامنا مع اللاجئين السوريين ! هاد مظاهر التضامن خليوها للكور للناس ديال لهيه دوك لي كايصدموهم هاد المشاهد ! حنا بلادنا عامرة بالسوريين من شحال هادي و بناس افريقيا جنوب الصحراء لي كلهم هاربين من جحيم الفقر و الحروب و المجاعات ! عاد فقتو ؟ بسم الله عليكم عاد طفات عليكم الشمعة؟ و زايدون من هادشي كلو راه حنا براسنا خاص لي يتضامن مع اطفالنا ! خاص لي يتضامن مع الدراري الصغار لي داخلين هاد العام للمرسة بصندالة د الميكة و ماعندهمش باش يشريو الكتوبة ! خاص لي يتضامن مع دوك بنات البادية لي هاد العام ماغايمشيوش يكملو فالكوليج حيت الكوليج بعيد غاتجلس تسقي الما و تحش الربيع للبهايم !! لاش كاتمشيو بعيييييييد باش تضامنو زعما الموجة لي جات نركبو عليها و نقولو للعالم اننا كانضامنو مع اللاجئين السوريين ! و حنا عندنا بنادم لاجئ فبلادو نيت ! كايبات فالزنقة و فالجرادي مفرش الكارطون ! حنا راه مقودة علينا تاحنايا بلا حرب بلا داعش عندنا بزاف ديال الوليدات كايشبهو لداك ايلان لي مات ! هو على الاقل راه مات لابس تريكو و سروال دجين و مكسي حنا راه كاين شي مناطق بنادم مالقا فيهم تا الكرصون باش يستر ترمتو! جميل اننا نتضامنو مع القضايا العالمية و لكن في المقربين اولى !
يمكن حيت انا كانعتابر نفسي كائن برغماتي ! عملي ! ماشي فنانة مبدعة ماعنديش داك الحس المرهف باش نفهم الغرض مورا ديك التشبيحة فالبحر شناهوا ؟ مافهمتش شنو الهدف ؟ شنو قضيتو بيها ؟ واش بدلتو شي حاجة فحال اللاجئين ؟ واش بشار شاف تصاوركم و حبس الحرب؟ داعش شافوكم و تخلعو ؟ واش اللاجئين السورين غايصبحو غدا في حال احسن بفضل داكشي لي درتو؟ لا اظن ! لا اظن انو التضامن ديالكم كفنانين في دولة من دول العالم التالث تاهي شبعانة ايلانات و ايخانات و مشاكل و فقر و هدر مدرسي سيغير شيئا اللهم داك الاحساس لي تاتحسو بيه دابا ديال "انا ماشي نكرة ! انا مهم ! انا درت شي حاجة"
راه تاحنا عندنا سوريا غي فدوار القلوشة ! دوار رجا فالله … غي فالخرجة ديال الرباط تقدر تلقا مناظر كاتشبه لاحياء بغداد بعد القصف الامريكي داكشي علاش كايجيو الكور يصورو عندنا الافلام حيت الديكورات ديال الحروب و القصف و الخراب موجودين بلا حرب ! و بالنسبة لاطفال للاجئين لي بغا يضامن معاهم راه كايكونو مع الربعة د الصباح فعين الدياب كايبيعو كلينيكس و الورد و كايمسحو الجاج ديال الطونوبيلات للناس لي خارجين من لي بواط… غي هوما ماسميتهمش ايلان ! سميتهم سعيد و حمد و مراد … و ماشي اكراد مغاربة !