للنساء فقط

بالنسبة لحياتك المهنية سيدتي، فثاني أحسن مهنة فالعالم من بعد "رقاصة " او مرات لعاب ديال الكرة .. هي مراتو ديال برلماني فالمغرب، كيشد ربعا ديال المنيول, وكيخلصولو المازوط والتران ,وكيعطيه الحبيب المالكي شي ربعة ديال التعويضات على قولة الله وكبار والشرقاوي.!!! دون احتساب الرسوم.. وعاد كيشريولو أيباد بحضاشرالف درهم من فلوسنا، باش يعطيهلك, باش انت تعطيه لثوريا أختك لي غتعطيه كادو للسعيد صاحبها, باش ميبقاش يتكوليكطا معاها من "السيفير " !!! زوجة برلماني فالمغرب سيدتي ,كتخليك تعيشي في طمئنان مطلق, حيت فاش راجلك كيخرج من الدار، كتكوني مأكدة منو فين ناعس .. يكفي تفتحي التلفزيون, وانت غتلقايه فاتح فمو كيشخر علينا فالقناة الاولى.. !!!!! مرات برلماني فالمغرب يعني راجلك غيجلس معاك عطلة ديال ست شهور وهو كيتخلص، وناشر رجليه فالصالة حدا البي اين سبور, تقدري تعطيه ينقيليك الجلبانة و يكابليك الدراري وممكن يصايبلك حتى الرفيسة العمية ، راه ولد لحرام معاندو ميدار .. وممكن كاع ديري انت لراسك شي مشروع من فلوس دارت ديال 2500 درهم لي غادي تبقاو ديروها منين دخل ليكم الشهرية ، وتفتحي امدام محل ديال الحلوة البلدية وهو يجلسلك فيه يشد لي كوموند .. راه ولد لحرام والله معاندو ميدار .. زوجة برلماني فالمغرب .. غادي تهناي من الطياب حيت راجلك ديما مغدي ولا معشي على حسابنا فشي بلاصة .. مرة واكل فالحزب مرة فاجتماع الامانة العامة مرة فجلسة فريق الوحدة والتعاضدية .. مرة فافتتاح ديال المركز المغربي لتقطير زيت اركان بأفورار … المهم متجي تسالي الولاية البرلمانية حتى تلقا راسك يلاه طيبتي ليه فالدار شي ربعة ديال المرات.. مرات برلماني فالمغرب يعني غتعيشو انت وراجلك على حسابنا واخا انتوما عاطلين على العمل مدام كاين المواطن حمار لي غادي ينوض يخدم عليكم كل صباح ..
ولكن لي عجبني فهاد القصة كلها هو " الساعيد " صاحب اختك ثورية لي خدا " الايباد" ..!!! على الاقل الشعب استفد شي حاجة من داك الخراي ديال راجلك …. !!