حسن مول ” الحلزونة “

كثر الحديث ” الفايسبوكي ” عن استفادة بعض الباعة من عربات نموذجية و استهزاء فئة واسعة من البشر ” الفايسبوكي ” بهاذ الخطوة ..
هاد السيد اللي في الصورة و للي مدور عليه بدائرة ، اسمه حسن ، ساكن في الزكاكرة ، كايبيع الببوش ، كايبدا العمل ديالو مأخر و كايسالي ما بعد منتصف الليل ، أي واحد كان مبلي بالتقاصر في المدينة لآخر ساعة ، ضروري غادي يكون كايعرف حسن و غادي يكون ضرب عندو البابوش و نص فيه البطاطا و البيض و الزيت …
حسن إنسان مكافح و بنفسو ، و عندو الكرامة ديالو ، إضافة إلى أنه إنسان واعي ، كنت أمر إلى المكان الذي يشتغل فيه ” الكروسة ” في آخر ساعة في الليل ، و كانتناقشو في بزاف د المواضيع و مع ديك الجوج او الجوج و نص كانطلعوا مجموعين للحومة ..
السؤال ديالي ، هو واش حسن ما يستهلش كروسة جديدة بمواصفات جيدة ، تليق بالسي حسن و الأخلاق ديالو ؟ واش بغيتوه يبقى ديما عندو ديك الكروسة المهلوكة الكحلة دافعها بالكشيفة ؟
الذي حصل هو ان حسن هاذي سنوات طويلة جدا و هو يبيع الببوش ، يعني ماشي المجلس البلدي للي دفعه او وفر له هاذ العمل ، بل أنه بنى منزله من عائدات عمله الشريف هذا ، و اليوم جات واحد الجهة ” المبادرة ، الجمعية ، الاتحاد الاوربي ، الدوري السعودي او الجن لكحل ” و حسن وفر 1500 درهم و دفعها فهاد الكروسة للي غادي تعطيه واحد القيمة مضافة سواء له او للمنتوج ديالو … فين كاين المشكل ؟
هاد الناس للي كايستهزؤوا بهاد المبادرة ، خص يكون عندهم شويا د الحس الإنساني ” واخا غير فايسبوكي ” و يفكروا بلي هاد المستفيدين راهم ناس كبروا أسر و يعيلون ابناءهم بكل كرامة ، هاد الكرامة للي بزاف د البشر ” الفايسبوكي ” ما عندوش …
صحيح أن حسن ما عندوش فايسبوك و ما مساليش باش يدخل في شي نقاش حول واش ” الحلزونة ” يا ما و لا يا بّا … لكن حسن صعيب يبيع راسو و ينتظر من أحدهم أنه يعطيه شي 50 درهم باش يبني عليها الموقف ديالو !!
الشباب القصري ، اللي ساخط و للي ينتظر من المجلس البلدي فرص شغل ” واخا السيمو الكبير قالكم اش كاين ” ماشي للي كايديروا السياسة … خصهم فعلا إذا بغاو حقهم يخرجوا للشارع و يحتجوا على المجلس البلدي يجيب لهم ديك ” الشينوي ” و يساءلوا الرئيس على المنطقة الصناعية للي فرعنا راسنا بيها و مازال ما كاين والو … ماشي تحڭروا بائعي الحلزون و بائعات الرزيزة !
هاد الشي ديال حسن ، كاينطبق على عبد الخالق ، مي زينب ، عبد القادر و اللائحة تطول …