خرجات فيك إهداء إلى الثورة التونسية

الزجال عمر حمداوي
يلا حضرات الحضرة يا حروفي
والساكن فيها ما سخى بالمسكون
جدبي يا لالة
جات عليك الجدبة
واللي يكون يكون
جدبي وڭولي
تونس الخضرة
ربي يرعاها
والبوعزيزي بذرة
والشعب رواها
حتى ولات شجرة
وشكون فينا ينساها
***
جدبي ونادي
يا بوطيارة فالسما
طالبة ضيف الله
ما صابت عش الرحمة
غير فيك يا أرض بيت الله
طيروها طيرة
حباب البوعزيزي
وتبعوها بالتكواع
نيكولا ساركوزي
ڭاليها دوزي
وعطيني بالتساع
عين الخوة بصيرة
واليد قصيرة
واللي ما خاف من الشوهة
خاف يا لالة من الصداع
***
جدبي يا حروفي وڭولي
خرجات فيك
يا وكال الراس
وناعس عل البطانة
كون ساق ليك
سرب حمامنا لخبار
يوصي عليك
مكة المكرمة
ويڭولها ردي بالك
من هاد الخوار
***
خرجات فيك
يا عرة الناس
يا خاوي لخزانة
كون ساق ليك
جبل عرفة لخبار
يوصي عليك
المدينة المنورة
ويڭولها ردي بالك
من هاد المخار
***
خرجات فيك
يا قليل الفهم
واش عندك ما تفهم
وخى تڭول هادي والتوبة
وتحب روس توانسة دار بدار
اللي دار الذنب
لازم يستاهل العقوبة
ما عليها غبار
***
ونتوما يا دوك نتوما
يا شر الحواشي
نحلف ما نحنت
عمر كلامكم ما يحلى شي
تونس راه صحات وجنات
وما دارت ليكم فاش تباتوا
وإمارات الصحوة عليها
واللي عندو فيكم شي غارة
يبزڭ هنا ويحسن فيها
بتسنط لعظامو
ويتسنى العدالة
واللي فرط يكرط
ما فيها مقالة