حديث الزلافة الحريرية الرمضانية -4-

حديث الزلافة الحريرية الرمضانية في وصف الحيل الذكية للوصول إلى القبة البرلمانية
)الحلقة الرابعة) ""
جائزة قناة الحريرة للأفلام الخاسرة
بطولة : حبوب الدنفراوي
سيناريو وحوار: محمد
القصة : سعيد
الإخراج : الوافي
اللقطات الخارجية: حميدو المسالي قبو
الموسيقى التصويرية : علال النفار
إنتاج : دار المصائب للأفلام المزورة
بعد العياذ بالله من الشيطان الرجيم والصلاة والسلام على سيدنا محمد سيد الخلق وخاتم النبيئين والمرسلين صلى الله عليه وسلم وعلى آله وصحبه أجمعين.
قرقبوا عليها سوارت الربح ولي ما صلى على النبي يمشي لجهنم.
يا سكان البرلمان عليكم مني السلام
حريرتنا اليوم ثقيلة , جامعة كل الأذواق..لذيذة وحارة بالأشواق.. فيها الجنوبي والشمالي فيها القديم والبالي.. حريرتنا عمرها عام ولي شربها يقول حامضة.. لكن راها والحمد لله شادة فبلاصتها شادة .. قادة على شغلها قادة .. ويدير يدو فيها إلي قال عليها باردة.
آسيادنا الممثلين ..
يا الفراكس
يا الزوينين
يا طوبات السكر
يا البرلبمانيين
فكروني بعدا يمكن الزمان نساني .. وريقاتكم ما زال لاصقة فحيوط المباني.. أنا ماشي من مقامكم .. مالي قليل لكن ما شي غشيم وعليكم ما شي براني..
أنت بعدا إلي هناك يا بو حنيكات فايت شايفك فشي بار أو فشي دار وخا انتا ناسيني .. أحياني عليك أحياني .. ما زال عاقل عليك كتغني آشداني نمشي للزين آشداني .. ونهار قلت فيك كلمة.. طردتي خويا من الخدمة .. وقطعت علينا الما فالحومة .. وحركتي مقادفك المعلومة .. بلا حيا بلا حشومة.. شايفك اليوم لابس جليلبة بيضا .. جاي تقلب على عضيضة .. إيوا عض معا راسك آسي البرلماني .. راه حالنا ما يتصلح.. حتى يموتوا إلي بحالك وترتاح بلادنا من سياسة عطيني نعطيك ما ننساك ما تنساني .. أنا درويش حريرتو ناشفة .. وانت مسلهم كلمتو واقفة .. أنا الشعب إلي عاق بيك .. وقاليق قيلو عليك .. ما صوت فانتخابات .. ما شارك في حملات .. ما سولك واش طابت ولا تحرقات.. طلق سياسة أحزابكم بالثلاث..وقال الرجا فالله هاجر ما صبح ما بات .. إلى كان هو لي مازال كاين وإلى فات تنعاودوه بالصفات والذات..
وانت يا بو نضيضرات .. سلم عليك طراف الحومة وقاليك عيب عليك وحشومة .. راه الحالة ما زال مضيومة .. نسيتيه ونسيتي خالتك فطومة .. كنت ديما مقرد حدا الدومة .. وتايفكرك نهار مقطع صباطك جيتي .. من قلة الخدمة عيتي .. لاصق لا ريال لا جوج حفيتي.. اليوم من الكبار وليتي .. بلاصت الطوموبيل عندك وجوج .. أحيانة عليك يا تريكة ياجوج وماجوج..
وانت يا بولحية شايبة .. ولتي كي شي شمعة دايبدة .. حريرتك قاصحة مارجة ماشي طايبة .. الجامع توحش فيك الشوفة .. فعايلك فضحاتك ولات معروفة .. وعرفناك على أصلك أنت ومرتك الحتروفة .. ما كان هامك غير راسك يا الجيفة.. شحال وصفتي فجمال الجنة .. وفوائد التمر والحنة .. ودخول البيوت بالرجل اليمنى .. وملي حطيتي قويعك على الكرسي كلشي عندك ولا حسي مسي .. ما بقينا عارفين فين كتصبح وفين كتمسي .. وفينا أرض مرسي .. وليتي شي حلجة يا حنيني .. يكتب عليك الوافي ونيني.. أحيانة عليك يا الغدار .. انسيتي الجار وأهل الدار .. ولكن دابا تجيبك ليام تاني راه الزمان دوار .. وإلي نسا الخير يحصد العار.. راه ماكلة البانان نساتك تغزاز الخيار.
الحديث:
حدثنا قبقوب الكسال عن صاحبه سفيان بائع الشمبوان عن معلم الفرناتشي التمتام عن زبيدة الشوافة عن الفنان سكيكو السفود عن المقدم المنفوخ عن زوجته سويهلة أنها سمعت زوجة البرلماني الضاوية ( دومينيك الحولة (تقول :
" من نهار جينا لهاذ الرباط ناض فينا الشياط ..الله يبقي الستر ما بقا خير ما بقات عرضات ما بقات أعياد .. ولا راجلي واحد من العباد .. كنا زمان من الأعيان ولينا هنا بلا عنوان.. لا شيفور لا متعلم لا شان .. بحال راجلي كاينين بالكيلو فالميزان .. شكون يقد على الرباط شكون .. تميننا نرجعو للدوار ونديرو برلمان محلي .. يكون فيه الحاج الرأس العالي .. لا رايس لا مرؤوس .. يا ويلي شكون يقد على الرباط من كثرة الروس .. السلام باليد نسيناه .. ما كاين غير التعناق والبوس .. الله يلعن بو الفلوس .. كنت فالدوار لالا مولاتي .. وليت خايفة فين مشيتي و فين جيتي .. شكون يقدر على الرباط شكون .. البرقاقا .. وكثرة العيون .. إلى بغا منصب برلماني با السيادي إما مهبول إما مجنون..
لبسوني جوبا حمرا ميني .. وقفوني نسلم على ألفونسو وطوني .. علموني نشد الشوكة والموس .. وليت ناكل المسوس .. وليت نجري كي الحمقة على النبوري .. الله يلعن بو الفلوس .. آويلي وا شداني .. الراجل ولا يلبس أرماني لاحني فالدار كي الصرة ونساني .. كانت كلمتي هي اللولة وليت ضومينيك الحولة .. شكون يقد على الرباط شكون ؟ "
أخرجه محبوب الدنفراوي في الجامع المائع في وصف حال الشعب الجائع.
إنتهى الحديث
التعليق على الحديث :
ونقلت الروايات الصحيحة أن زوجها البرلماني .. لم يكن يعرف أن البرلمان موجود في الرباط وأنه كان يعتقده في أميركا .. ولذلك ومنذ توليه المنصب الجديد لم يكف عن البحث عن أي سبب لزيارة الولايات المتحدة والتبرك بأولياءها وأسواقها مدعيا أنه يسافر لتفقد شؤون المغاربة في الخارج .. وفي آخر زيارة له شوهد وهو يلتقط صورة مع تمثال السي براهيم لينكولن .. فلما سأله أحد الصحفيين المهاجرين ما الداعي لهذه الصورة .. قال له الحاج حتى يتأكد الجميع أنني التقيت مع الرئيس الأميركي..؟
آسي البرلماني
اسمعني مزيان اسمعني
شعبنا شعب نطفة فنان
فيه الخير وحب الإنسان
محب للسلم عشاق للأمان
وأحسن نكت عندو .. يقولها فالبرلماني
سودنتونا بمسيح الكابا آمسيو البرلماني
افهم القوافي وعيق بالمعاني
البرلمان بالعمل ما شي مجاني
حريرتي اليوم ناقصة طحين
حالها حال القلب الحزين
على حال المغرب الحنين
السياسة فيه بحال الطياب والعجين
والفران سخون والطباخ مسكين
إنتهي التعليق
أستودعكم الله تقاضات زلافة اليوم ولقائي معكم غدا في زلافة جديدة
أما الآن فأترككم مع أغنية مرسول الحب
وأدعوكم بعدها للإستماع لحلقات سابقة من الزلافة الرمضانية في إخراج إذاعي على الرابط التالي
www.moroccopost.net

انقر هنا لقراءة الخبر من مصدره.

مواضيع ذات صلة

حديث الزلافة الحريرية الرمضانية-12-

حديث الزلافة الحريرية الرمضانية -10-

حديث الزلافة الحريرية الرمضانية -8-

حديث الزلافة الحريرية الرمضانية - 2 -

حديث الزلافة الحريرية الرمضانية - 3 -