أشباه رجال يا مصر

‫أشباه رجال يا مصر
شعر ميادة مدحت
أشباه رجال
يا مصر
هو ده نصيبك م الرجال
أشباه رجال مالية الشوارع بالسؤال
معقولة تونس فيها ثورة
فيها طلقة فجر حرة ؟
معقول ف تونس فيه رجال؟
دار السؤال
دار ع القهاوى والبيوت
دار ع القلوب اللى ملجمها السكوت
معقول ف يوم نعلنها ثورة؟
أوضاعنا غير أوضاع جيراناَ
نخاف عيالنا يتشردوا
نخاف نموت !
دار السكوت
يسقينا علقم حلمنا
المخنوق بإيدنا
ويطارد الغضب اللى
مصبوب فى وريدنا
ده الوضع غير الوضع
واللى شايف غير كده
ياريت يفيدنا
والوضع غير الوضع
مين قال غير كده ؟
ده شاب واحد مات فى تونس
صرخة واحدة
طَلعت ملايين
يردوا لها الندا
طب شوفوا كام واحد فى مصر
راحوا من يوم ما ابتدا
حكم الزعيم المفتدى
كام ألف فى سجونه اتنفوا
على ألف فى بحوره اختفوا
على ألف كسحهم بوليسه
وهما فينا بيهتفوا
كفاية ياريس كفاية
كفاية يا شعب .. اكتفوا !
لكنه شعب من الحريم
مكسور جناحه
والغباء مكتفه
قلوبه تلعن فى النظام
وتسب دينه وخلفته
وألسنة طول البيبان
واقفين له جيش وديدبان
وبحياته وبيهتفوا !