القناة الرياضية المغربية، و من خلال برامج هاذ الأسبوع، قدمات برنامج كتناقش من خلالو الإحتراف اللي بدا التطبيق ديالو هاذ الموسم 2011/2012 ، و هكذا انطلاقا من هاذ السنة تفرض على الفرق ديال البرميان سيري و الدوزيام سيري، دفتر التحملات في أفق تطبيقو على فرق الهواة السنة الماجية. و من بين أهم شروط دفتر التحملات هو أن الفرق ديال القسم الأول خاص تكون عندها 900 مليون فالكونت ديال الفرقة، و القسم الثاني 600 مليون، و الهواة 60 مليون.
الضيوف كلهم أكدوا فالتدخلات ديالهم بلي الرهان من أجل انجاح مشروع الإحتراف هو فيد المجالس المنتخبة خصوصا فتوفير الميزانية و كذا الملعب ، و هو نفس الطرح اللي أكدوا السيد أحمد غايبي عضو الجامعة الملكية المغربية لكرة القدم خلال التيراج ديال البطولة 2011/2012 . اللي فرحني فهاذ الحلقة، هو أن أحد المستشارين الجماعيين ديالنا و هو فنفس الوقت نائب للرئيس، تصادف معا هاذ البرنامج دارو و جلس كيتفرج عليه، و صرح لي شخصيا بلي"دابا الكرة ديالنا عاد غادي تزيد لقدام ، و لكن دفتر التحملات هو فالحقيقة صعيب شوية ".
قلت معا راسي اذن ما بقا حتا تبرير للمجلس ديالنا الموق ، الا كان ما سمعش او دار راسو مافخباروش الرسالة الملكية ديال 24 أكتوبر 2008، أو ما طالعش على مضامين الدستور الجديد اللي صوت عليه، ها هو كيقولها بعظمة لسانو أنه تفرج و فهم الإحتراف اللي بدا كيطبق هاذ السنة ، و الا بغا الرياضة التازية حتا هي تواكب هاذ التطور خاصهم ينخرطو فهاذ الصيرورة التاريخية اللي راحنا فيها. دابا و نحن على أبواب التهييئ للميزانية الجماعية ديال 2012 ، خاص المجلس الجماعي ديالنا يفكر فتطوير الرياضة التازية و يبدا من الزيادة فديك الفصل المخصص للرياضة اللي بالمناسبة كيتعتبر من أهزل الميزانيات على المستوى الوطني ( 70 مليون سنتيم مقابل 36 جمعية رياضية )، خصوصا ان عندنا فرق كتمارس على مستوى عالي " قدس تازة : القسم الأول هواة لكرة القدم – جمعية تازة : القسم الوطني الثاني لكرة السلة – الجمعية و الاتحاد و النادي البلدي : القسم الوطني الثاني لكرة اليد + اتحاد تازة اناث : القسم الوطني الأول لكرة اليد – جمعية تازة للريكبي السباعي : القسم الوطني الأول – أندية ألعاب القوى " و الا جينا نشوفو متوسط الميزانية اللي خاصهم يبداو بيها خاص على الأقل 35 مليون سنتيم للفريق . لكن ما عليهش إلا المجلس الموقر فكر يزوج الناس و يدير ملتقيات كيجي البراني غير يزرد فيها . نكتة : في لقاء ديال السيد العامل مع أحد الفرق التازية و بحضور رئيس المجلس البلدي، السيد العامل طلب من هاذ الفريق أنه يحاول يصعد للبطولة النخبة و خا غير القسم الثاني . منين قالوا ليه راحنا و اخا نطلعوا راحنا ملزمين بدفتر التحملات او نرجع للهواة ، سألهم شنو خاص فهاذ دفتر التحملات ، شرحوا بلي راه على الأقل كيطلبوا ملعب + 600 مليون بالنسبة للقسم الثاني ، قالهم هاذشي بزاف ، و سأل رئيس المجلس شنو تقدوا تعاونو ، جاوبوا الملعب كاين أما 600 مليون .... تبسم السيد العامل وقال : هي تازة عمرنا نشوفوها فالقسم الثاني. وا فينكم ألكويرة ديال تازة ؟؟؟
