مقال اسبوعي يُكتب عُنوة بالدارجة المغربية على تازاسيتي
مجمع الصناعة التقليدية؟ شكون فينا اللي ما كيعرفش هاذ البناية؟ أغلبيتنا تدخلها فشي نشاط جمعوي أو سياسي، و كاين اللي كيحسابلو بناية مهجورة . هاذي واحد اليومين، كنت مع واحد صاحبي فايتين جنبها، و حنا كندردشوا فالتسيير المحلي ديال تازة و الانتخابات، وقفني قبالة مجمع الصناعة التقليدية، و قالي : بحال دابا ، هاذ المجمع غير ضايعة فيه الأرض ، شحال هاذي و هو مهجور، علاش ميستثمروهش فشي حاجة.
قولتلوا : أودي، راه هذا هو مقر غرفة الصناعة التقليدية، راه كاين فيه مكتب رئيس الغرفة، و مكتب مندوب الصناعة التقليدية، و مجموعة ديال الموظفين .
آواه السيد تفاجئ و قالي : لا ، و اش كتكلم بصاح ، هي إنا ماشي ولد تازة ؟
فعلا ، الناس مكتهتمش بالانتخابات غير المباشرة ، كتعرف غير الجماعة و البرلمان . فإلا كانت الغرفة ديال الصناعة التقليدية كاتبان إدارة مهجورة ، فكيفاش هو حال الصناعة التقليدية و الصناع التقليدين بتازة ؟ و فين هما الناس اللي كيصوتوا عليهم و ما كيبانوا غير فالانتخابات ، لا ممثلي الحرفيين ، و لا رئيس الغرفة ، و لا مندوب الصناعة التقليدية ، و الله إلا معظم الحرفين إلا ما قولناش كولهم ، ما كيعرفوا وجه هاذ المندوب .
قلت ، تازة من أقدم المدن المغربية ، و صناعتها التقليدية كانت كضاهي الصناعة التقليدية ديال فاس ، مكناسالرباط ، أسفي ، مراكش . و كانشوفوا يوميا الإشهارات فالتلفزة كتحدث على النهوض بقطاع الصناعة التقليدية ، و باغا ترد لها الاعتبار في ظل العولمة ، و السوق الحرة و المنافسة ديال الخارج ، و حاطه فلوس كبيرة لهاذ الشيء ، ففين هو موقع تازة من هاذ البرامج ؟
مشيت كنبحث فالأرشيف ، وجدت مجمع الصناعة التقليدية بحال شي بناية مهجورة ، اللي كاتجي منها الخوف ، و فعلا ما تصلاح تكون غير أرشيف .
سمعت على القرية الحرفية بتازة العليا جهة المصلى ، لقيتها حتى هي ما شي غير مهجورة ، ربما تصلاح يمثلوا فيها قصة أصحاب الكهف ، غير السوار ، الزاج مهرس ، و شي كلاب فالباب (حشاكم) و الحاضي الله ، و ايلي ، و اش هاذا هو حال الصناعة التقليدية بتازة .
سمعت بلي المجلس البلدي فواحد الدورة تفوبر على غرفة الصناعة التقليدية بالأرض فين دير مركز لتكوين الحرفين، الأرض خذاوها ، و شي مركز ما داروه ؟ دابا عاوتني سمعت بلي رئيس الغرفة لاصق باش يعطيوه أرض أخرى باش يدير مركز لتكوين الحرفيين.
سبحان الله ، فين هو الأول ، أسي رد الاعتبار غير لذيك البناية اللي سميتها مجمع الصناعة التقليدية، و جمعنا شي نهار الحرفيين واخا غير بالكذوب ، ضرب على ذيك القرية الحرفية باش تفتح ، راه الناس ماليين الدبلومات مساكن بالبطالة نساو شنو قراو فمعاهد التكوين ، و عاد باغي تزيد الأراضي .
و هاذي هي ما قدوا فيل زيدوه فيلة . إوا سمو نقولك ، بحال هاذ المسؤولين هما اللي مخليين تازة ، اللور ، اللور.
