الأحداث المغربية تتهكم على الصحفيين المتسخين

ثلاثة ديال الصحافيين المغاربة قرروا دفعة واحدة وبضربة معلم بحال إلي تيقولو المصريين، أنهم يرفعون دعوى قضائية ضد نفس الشخص، الأمر كيتعلق بعلي انوزلا مول موقع لكم الالكتروني وبتوفيق بوعشرين مول أخبار اليوم المغربية، وبمحمد الأشهب مول نعمان الهاشمي على جورنان المساء واللي من نهار نيني مباقاش كيكتب فهاد الجورنان لأسباب كتخصو هو وكيفهمها أكثر من الآخرين بكل تأكيد.

الخوت بثلاتة، ولا الزملاء اللي بغيتو تسميوهم سميوهم، رفعوا دعاوى قضائية ضد نفس الشخص اللي حتى هو زميل واللي سميتو علي بن الزوينة ومعروف بعلي مبارك، سباب هاد الجملة من الدعاوي أن السيد كتب شي حاجة بخصوص علاقة هاد الزملاء بالنظام الليبي البائد، وهي اتهامات ما يمكنش لينا نعاودوها ولكن فغالبيتها كتعلق بالذمة المالية والتورط فشي حويجات معا العقيد.

انوزلا أكد الخبار ديال الدعوى وكذلك الأشهب وبوعشرين، وتضافت لهاد الدعوى، دعوى ثانية ضد حكيم بديع ديال النهار المغربية بتهمة نشر نفس الوقائع اللي نشرها الموقع ديال علي مبارك.

هاد الشي ديال الدعاوي بين الزملاء خايب بزاف، شي كيدعي وشي كيدعي فشي وعلى شي حتى لعند مول الشي.

المراسل ديالنا البركاك اللي غير كيحنزز هاد الأيام، كيطالب باخراج الهئية ديال الصحافة المكتوبة لحيز الوجود باش هاد الشي ديال الدعاوي الزملا مايبقاش يمشي للقضاء.

أحسن حاجة ننشرو التصبين ديالنا الموسخ غير فالسطوحا ديالنا ولا جرناناتنا ومواقعنا، علما انه ما كاينش شي فرق كبير بينها وبين السطوح.

شنو قلتو ؟ نأسسو الهيئة ونطلقوها ولا باقي الحال عليها.

عن جريدة الأحداث المغربية ليومه الخميس 15 شتنبر 2011