حوار بلعاني مع مسؤول بالعمالة فوقاني

- كولينا كيفاش درتي اسي حوسا حتى وليتي مليونير ؟
*** اولا انا بعدا ماشي سي حوسا انا السيد رئيس قسم الميزانية والادوات...عنداك تمشي غالط.وخص كولشي يحتارمني ويخاف مني.واش عارف شحال ديال الفلوس فاش كنتصرف او لا...
- واخا امول الشكارة....
*** اسيدي عمرك لقيتيني تنقطع البونات فالسوق...نهار نشد هاداك الصوحافي ديالكم الي تيكتب عليا وتيسميني بلقاس غادي نصيفت باباه للحبيسي.وخصك تعرف راه الشعر مشا ليا غير بالعلم والمعرفة والمسؤولية والمهام الكبيرة ديالي...
- ولكن حتى تحراميات تتجيب الصلعة...على أي حال جاوبني دابا على السؤال ديالي من فضلك.من اين لك هذا ؟
* *** الملاين اللي عندي واللي سبق صرحت بانها وصلات 400 مليون سنتيم درتها بالجهد ديالي والحنكة والقراية.علاه بغيتيني نبقا نتفرج فالحبة تادزود من قدامي بلا من ندير والو .واش حماقيتي ولا مالك...
- ولكن كولينا كيفاش؟
**** عرفتي شحال من ميزانية عندي وشحال من مارشيات..ودابا غادي يزيدوني الصفقات العمومية ياحليلي...غادي نوصل لمليار انشاء الله...
- ولكن علاه العامل ماتيشوفش اش تاتدير...ورئيس المجلس الاقليمي؟
- اح القضية حامضة مع هاد العامل...ولكن درت ليه شي جداول من سوس معمرو يهز الرأس ولا يقيسني...علاه ماشفتي اش دار كاع خربق العمالة غير انا ماقدرش يمسني...اما رئيس المجلس ماعارف والو فالمالية واخا قاري ومثقف زعما...راني تاندير مابغيت.
- خلينا من الجداول والحروزا...واش العامل صاحبك؟
* *** ماشي شغلك....وزايدون هاد الشي من اسرار الدولة العليا.
- كول لينا علاش تاتدير الميز بين الموظفين وكتهضم الحقوق ديالهم ؟
*** * الموظفين حرايمية ماتيقدموش فروض الطاعة والولاء اللائقين بالمقام العالي ديالنا سوى هادوك صحابي الفلتويين .
- حسن الالفاظ ديالك راك زعما تتصلي.
**** الصلاة... راه ماكاين غير الجلالب والقوالب مع الكوانب...
- كاينين شي موظفين طحنتي الرابيل ديالهم ورفضتي شخصيا استافدو من مستحقاتهم المالية ومادارو ليك والو.بغينا نعرفو علاش ؟
* *** هادوك شي 13 موظف توظفوا سنة 2003 وتخلصوا سنة 2005 وحيدت لباباهوم الرابيل باش يعرفو باللي انا هو الكل في الكل فالعمالة.
- علاه كلشي فيديك ؟
* *** ايوا ماعرفتيش المحساد لاخر بلي انا اللي تنسير العمالة.عندي الميزانية العامة والميزانية الاقليمية وميزانية نقابة الجماعات وميزانية المركز السياحي ببوكماز ونزيدك الصفقات العمومية فالطريق وحتى الفلوس ديال المبادرة الوطنية جاية ...غادي نقلي ليكوم السم مزيان...
- ماخفتيش شي نهار تحصل ؟
***** انا ماشي شغلي راني مخبي ورا العامل لي تايسيني على كلشي.
- ولكن خصك تعرف بلي نتا مقيد فاللوائح ديال منظمة ترانسبارنسي المغرب.
* *** غادي يعطيوني شي جائزة حيت انا مسؤول كبير ومهم ياك...عطيني التلفون ديالهم عافاك ...
- هي منظمة دولية ضد الرشوة والفساد .
* *** عافاك كول ليهوم اشطبو عليا من اللائحة الانتخابية...اجي متتعرفش شي فقيه ضربتو واعرة.خصني نعطي لباباهم شي دقة تخسر ليهوم الريزو ماعمرهم يشدوني.
- اشناهيا حصيلة العمل ديالك فالعمالة من نهار تحملتي المسؤولية ؟
* *** الحصيصة او الحصيلة ؟بالنسبة للحصيصة درت علاش نرجع وعندي الحبة مزيان. اما الحصيلة مغاديش نحصل حيت غادي ندور وندبر على شي انتقال الى احماضت القضية ويقدر كاع نترقى لشي منصب اكبر.
- لا الحصيلة هي زعما اشنو حققتي من انجازات ؟
*** * جهزت الضيعة فافورار مزيان ودرت لكليماتيزور فالدار كاملا ودرت برطما فبني ملال ودابا تنبني دار فالفيلاج...ونزيدك عندي هري ديال المواد الغذائية فازيلال ومحل ديال النجارة فافورار.
- كاع هاد الشي و ماعطيتينا لا كاس داتاي لا عصير...لا كاس دالماء....الجفاف عندك هنا ولا كيفاش ؟
* *** سكت اصاحبي ماتفكرنيش فالعصير.مشا ليا التريتور وبقيت تندور...كنت تنضرب الحبة و العصير ودابا بقيت على الحصير.
- كول لينا دابا كيفاش تادير لهاديك الحبة حتا كتضربها طايرة ؟
* *** هاداك هو الجيمناستيك والقنص الجوي...واش عندك البيرمي ديال القنص...راه عندنا فالإقليم محميات كثيرة وزوينة.
- كول لينا ايضا كيفاش شي موظفين عندك دارو ديور وعمارات وسيارات بلا كريدي.
*** * هاداك الشي مرتبط بالنيشان...الا عرفتي تنيش غادي تجيبها فالتسعين والا معرفتيش غادي تغرق فالكريدي حتى الودنين.
- دبر لينا على شي بون دالمازوط راه جينا من كازا باش نديرو معاك هاد الحوار الحصري .
**** بلعما اودي امون جورناليست...دابا راني مضارب غير معا لبلان ديال الطوموبيلا ديالي لي حاسديني عليها شي قماقم هنا.
- كول لينا كيفاش درتي حتى حيدتي رئيس القسم التقني من المنصب ديالو ودرتي صاحبك فبلاصتو ؟
* *** قمنا بمؤامرة سلتوية فلتوية مشتركة ضد هداك خينا حيت فيه النفاخات بزاف ومابغاش يطيح معايا فالخط ودرنا ليه حتى هو شي جداول مبخرين حتى مابقاش العامل تيحمل فيه الشوفة وبركنا عليه بالتبركيك حتى نجحت الخطة.
- اشناهيا المواقع لي باقي مستهدفة عندكوم ؟
**** هدا سؤال وجيه.حنا دابا قانيين على القسم القروي واخا فضحنا هاداك الصوحافي ديالكم وبغينا نحطو فيه خادمنا الوفي.
- ولكن علاش كاع هاد الشي؟
* *** حنا بغينا نسيطرو على العمالة باش نديرو لي بغينا وباش ما يتبعنا حتى واحد من بعد.
- ولكن انتوما ولاد البلاد وخصكوم تخدموها انتوما الاولين...
* *** غادي نقادو لباباها الخدمة مزيان ماتخممش.البلاد...اش من بلاد...بلاد الاوباش...الله يخليها سلعة.
- انت الان مسؤول كبير في العمالة.اشنو هو الشعور والاحاسيس ديالك ؟
*** * غير سكت اصاحبي.كنت ربنا خلقتنا.كنت تنبيع الديطاي وجنابي باقين ضاريني من ركوب البهايم تحت الزيتون...ودابا انا فين وانت فين.كنت في فترة قريبة متوتر نوعا ما ولكن بعد ما نلت رضا صاحب القرار مابقا تايهمني حتا واحد.لا محاسبة لا سيدي زكري ولا حتى ادريس بن زكري براسو كاع.
- ختاما اسي حو...
* ( *** مقاطعا بحدة ) واااابنادم راني كلت ليك هاد \"السي حو...\" ما بقيتش بغيت نسمعها...
- عفوا. بغيت غير نعرف الطموحات والاحلام المستقبلية ديالك...
* *** دابا ملي ضمنت بلاصتي مزيان غادي ندخل سوق راسي شوية حتى يمشي هاد العامل ومن بعد ارا برع...اما طموحاتي المستقبلية...كون لقيت نولي كاتب عام ولا عامل كاع...اجي ماعندكش شي كو دو بيسطون صحيح فالرباط...راه الحبة كاينة ماتخممش...اجي سكت السجالة وماتسجلش هاد الفقرة الاخيرة....قطع اصاحبي قطع...
اقتباس عن الجورنان الأسبوعي ديال جريدة \" المساء\"
الحوار من انجاز فريق الوكالة
Azilal press news
azilalpress@gmail.com