الرباعة ديال زيان وحاجب غاديين وكيتعرّاوْ وكل مرة كيبان شي واحد أو شي وحدة كيهبط ليهم السروال اللي عياو يديرو ليه السمطة بلا فايدة. دابا آش عاود تاني غدي يقولو البانضية على هاد أنور الدحماني اللي خرج ليهم من الجنب وفرشهم فالصحافة بوجه مكشوف؟ هاد الشخص، اللي حاولو يستغلو الظروف ديالو باش يغرقو ليه الشقف مع بلادو، انقلب عليهم وعطى معطيات خطيرة و دقيقة على المؤامرات ديالهم وعندو أشرطة صوتية كتأكد الأقوال ديالو. هو بلسانو كيقول تزاد معاه الزايد وعاق باللعبة، وقرر يقلب الطبلة على هاد الشلاهبية واللي ليها ليها. هاد الشخص كيتكلم بوضوح. كيقول أنا خويت لبلاد لظروف معينة ومشيت كنضبر على راسي فبلاد الصبليون حتى لقيت شي وحدين بغاو ياكلو الثومة بفمي. السيد كيعترف بأنه مدة وهو مقولب وبأن العصابة الزيانية كانت كتستغل الجرأة والحقد ديالو على شي أشخاص، باش يدخل معاهم فخيانة الوطن وتشويه سمعة البلاد والعباد. أنور الدحماني، كيأكد بأنه كان كيتقاتل مع الوقت فاسبانيا حتى تاصل بيه زيان اللي بقى كيحرض وينفخ فيه بطريقة ماكرة ومن بعد طلب منو يعاون البوليسية وهيبة خرشش باش تستقر مؤقتا ف Malaga عاد تمشي لمريكان. وزاد الدحماني وقال بأن عندو الدليل بأن زيان هو اللي عاون العشيقة ديالو في الهجرة السرية لأسبانيا عبر مليلية وحكى كيفاش استعمل النقيب السابق للمحامين أسلوب العصابات وحيل شبكات تهريب البشر باش يسهل المأمورية لصاحبتو. هاد المسألة خطيرة بزاف لأن تصريحات الدحماني والدلائل اللي عندو كتزعزع كل المشككين اللي كيقولو بأن زيان مظلوم. وكيزيد الدحماني وكيقول بأن زيان طلب منو يدافع على سليمان الريسوني المسجون بسبب هتك عرض شاذ جنسي واخا هو بعيد على هاد القضية وما فاهم فيها والو. السيد كيعترف بأنه معندوش ثقافة سياسية ولا أي تكوين قانوني وبأن زيان كان كيفتي عليه آش يقول. واش هادي ماشي فضيحة؟ محامي ووزير سابق وسياسي معروف باللسان الطويل تآمر على البلاد والمؤسسات لمصالحه الشخصية والشبقية !؟ أكثر من هادشي، أنور الدحماني كشف بأن زيان والحياحة ديالو، بما فيهم دنيا الفيلالي ومحمد حجيب وزكريا المومني وشلاهبية آخرين، دايرين تاكتيك محبوك باش منين كيسكت واحد كينوض الثاني يتكلم بنفس الهدف اللي هو ضرب الملكية واستهداف الركائز المؤسساتية ديال البلاد، وزاد قال بأن هاد العصابة مضورينها فلوس بيناتهم. العجيب فهادشي هو ان أنور الدحماني كيصرح بأن هاد التحالف ديال الشر كيجمع ناس عندهم خلفيات ايديولوجية ومصالح ذاتية مختلفة ومتنافرة. ها الجمهوريين، ها الاسلاميين، ها صحاب اليوتوب والبوز، ها الانقلابيين، ها الخيش بيش... لدرجة ان حتى محمد حاجب اللي معروف بأنه متطرف كان كيتصل بيه وكيشجعو باش يسب الدولة المغربية ! دابا كيفاش هاد الموالي لتنظيم القاعدة الارهابي واللي بايع الماتش فألمانيا رجع كينسق مع الدحماني الموالي للحركة الجندرية؟ آش هاد التقارب الغير طبيعي والمخالف للمنطق والمبادىء الاسلامية؟ آش هاد النفاق والانتهازية والسفالة؟ معروف بأن حاجب كيعجبو يدير فيها عنتر سياسي افتراضي وكيركب على الاحداث والوقائع باش يبان نزيه وضحية ، ولكن توصل بيه الدرجة يتعامل مع واحد من الأقلية الجنسية ويعطيه تمويل باش يدير تسجيلات ضد الدولة والمسؤولين ديالها، فهذي قمة "الشذوذ الاخلاقي" وكيهبط السروال ديال حاجب قدام أمة سيدنا محمد. الحاصول، القمايرية والخوايضية كيجيبليهم الله اللي يهرس ليهم السنطيحة ديالهم بحال هاد الدحماني اللي لاقى ليهم الريوس ومازال غدي ينشر الدلائل اللي عندو باش يدير ليهم ميسة. وكيف كيقولو المغاربة، مازال العاطي يعطي وصياد النعام يلكَاها يلكَاها. يتبع...
