المنادجير "مفيد السباعي" ل " أخبارنا " : "بولماني" خربق الأوراق و الحسابات ديال بزاف الفنانين

في ظل التحولات التي تعرفها الساحة الفنية عموما، و الموسيقية على وجه التحديد، كثر الجدل خلال الآونة الأخيرة عن " المنادجير " أو " مدير أعمال الفنان "، كيف اقتحم هذا " المكون " الجديد عالم الفن، ليصبح أداة أساسية في المعاملات الفنية بين الفنانين و المشرفين على إحياء المهرجانات و السهرات، حتى أضحى معادلة ضرورية لا يمكن التعاقد من دونها، البعض يعتبره " سمسار " و البعض الآخر يصفه بالوسيط، في وقت يجمع الكثيرون أنه جدار قانوني يحمي الفنان من آي خطر قد يحدق به، سيما فيما يخص التعاقدات، حيث يصبح الفنان عرضة للنصب، لاجل ذلك، و من أجل معرفة تفاصيل أكثر عن هذه " المهمة، كان لنا في موقع " أخبارنا " حديث خاص مع " الماندجير " مفيد السباعي، واحد من الأسماء التي برزت بشكل لافت خلال السنوات الماضية، إثر مساهمته في سطوع نجم فنانين كبار بالمغرب.

س : ما هي الأسباب التي دفعتك إلى اقتحام هذا المجال و متى كان ذلك ؟

بديت المشوار ديالي ما بين 2008 و 2009 و ما جاش غير هاكداك. كنت من المولعين و المتتبعين و المستمعين للموسيقى المغربية العصرية والغربية في الصغر ديالي. كنت من المعجبين و Fan ديال الإخوان بوشناق . مجموعة أفلاك ، التيوسي كنت دائما كنقلب على الجديد ديالهم و دائما كنحضر الحفلات ديالهم و كذالك نتلاقى معاهم(هادشي ابتداءا من 1988 ) و لحد الآن عندي كاسيط ديالهم و بعض الصور..) كنت متبعهم لأنهم كانوا من الأوائل لي "عصرنو" (عصري) الموسيقى المغربية... و سبحان الله هاذو كاملين خدمنا معا و ولينا أكثر من أصدقاء …

س : شكون هما الفنانين لي سبق لي اشتغلت معاهم على مستوى إدارة الأعمال ؟

قبل كنت كندير هاد الخدمة بعفوية بلا منعرف بأنها تدخل في إطار (إدارة أعمال الفنانين) حتى نصحوني بعض الأصدقاء وكذلك بعض الفنانين من قبيل Don bigg ، غاني، عزيز أفلاك .. هما لي شجعوني. بديت مع بزاف ديال الفنانين سواء بطريقة رسمية أو فالخفاء سواء لي معروفين أو لي يلاه بداو...أسماء كثييييرة بلا حساب .... كاين لي كيعترف أمام الملأ و كاين لي مكايعترفش و كاين لي كايقولها غير فنفسو هههه....

س : واش أي واحد ممكن يولي " ماندجير " أم أنها كتحتاج لدراسة ومعرفة بالمجال ؟

إدارة الأعمال راه ماشي هي تجيب الحفلات و صافي… مدير الأعمال مسؤول عن رسم الطريق للفنان .. تقاد ليه الصورة ديالو ..تقلب معاه على كتاب كلمات. موزعين . ملحنين..تكون عندك دراية بالمجال القانوني ، اللوجيستيكي ، المالي ، يكون عندك carnet d adresse باش يمكن لك توصل الجديد لأكبر عدد ممكن ديال المتتبعين......يعني مجهود كبير كيدار...و هادشي را خاصو إمكانيات مادية و هاد الإمكانيات المادية العدد منهم معندهومش … هادشي كامل باش تبينو فأقرب وقت و تكون عندو سمية مع لي كاينين قبل منو...

س : أشنو هي أهم المشاكل لي ممكن تواجهها مع الفنان ؟

المشكل هو فاش كتبينو فظرف مثلا عام أو عام و نصف، عوض مثلا خمس سنوات او أكثر إلا كان بوحدو، كيولي كيطالب أنه يدير لفلوس حتى هما فأقرب وقت ههههه .. كيولي باغي الحفلات الكبار و هو معندو والو.... وهذا غلط، لأن الواحد إلى حرق المراحل معمرو غادي يزيد القدام الواحد يمشي دقا دقا وكذلك مايتغرش(الغرور) ...و يد وحدة مكتصفقش....

س: في ظل هذه المشاكل لي تحدثي عليها واش أنت مزال مقتنع أنك تواصل العمل في هذا المجال ؟

و رغم كل هذه المشاكل، الحمد لله دائما متفائل و كل مرة ربي كيلاقيني مع ناس مزيانين لي كيشجعوني أو لي كنخدمو جميع.. ولي كيقدرو المجهود لي كندير … دبا أنا مرتاح تماما مع الفنان الكبير لي كنعتبرهم Une Legende، بحال حميد بوشناق ، سلطانة الطرب La Diva ليلى غفران ، الشاب سفيان نحاس لي من الأوائل لي خدمنا مع بعضنا . رفيع وكذلك مغني الراي في الغربة الشاب كاديل …

س : أكيد أنك راسم أهدافك المستقبلية … فشنو هو الطموح ديالك ؟

الهدف ديالي و الحلم ديالي من شحال هادي هو تولي الموسيقى المغربية مسموعة عالميا وخا تكون بالدارجة .. نعطيك مثال : علاش فاش كنسمعو لأغنية Psy كنفهمو شي حاجة ؟؟ و لكن الأغنية ولات معروفة عالميا ، هذا هو الهدف ديالي إن شاء الله.

س : تقييمك للمشهد الموسيقي بالمغرب .. كفاش كتشوفو بعيون المجرب ؟

الساحة الفنية دابا مرونة. كولشي دايخ كل واحد باغي يدير شي حاجة فشكل و بأي طريقة واخة عارفها مغديش تجي معاه...المهم يدير #Buzz و يهضرو عليه الناس سواءا بالمزيان او بالخايب … هادشي مزيان يوقع، باش من بعد الأمور تقاد و حتى الناس دابا را بدأت كتوعا و ولات كتعرف شنو لي مزيان و شنو لي ممزيانش و الدليل هو هادشي لي طاري دابا ....و لي كان آخره أن بولماني خربق الأوراق و الأوراش و الحسابات ديال بزاف الفنانين.