شهدت مدينة تطوان، ليلة أمس السبت، حالة وفاة جديدة بفيروس "كورونا" المستجد في مستشفى سانية الرمل، تعود لشخص مقيم بالخارج كان يبلغ قيد حياته 43 سنة، دخل أرض الوطن الشهر الماضي، من أجل الاطمئنان على والده بعد تعرضه لوعكة صحية . وخرجت شقيقة الراحل "مروان اليونسي"، لترد على مجموعة من التساؤلات والشائعات المتداولة في الساعات الأخيرة عبر مواقع التواصل، حول سبب وفاة شقيقها، موضحة سبب تأكيدها في تدوينة سابقة على أنه كان يعاني من تسمم غذائي وليس مصابا بالفيروس، رغم تداول معطيات تفيد عكس ذلك من طرف بعض أصدقائه. وقالت شقيقة المتوفى في تدوينة فايسبوكية "اخي الحبيب كان هنا معايا فبروكسيل و مراتو و ولادو بقاو فاسبانيا .. جاء باش يعمل الإقامة هنا باش يتجمع معانا حنا خواتو .. "، مضيفة قائلة "تزاد الحال على الأب ديالي الحبيب للي يالاه توفى هادي 10 ايام .. سماحنا فكلشي و هبطنا نطللو عليه و مدة الزيارة كانت محددة في 10 ايام فقط .. انا دوزت غير 5 ايام فقط و طلعت و هو قالي خصني نبقا مع با كنخاف غير انا نمشي والله يدي أمانتو .. اخي الحبيب هبط في صحة جيدة و ممتازة ما فيه والو .. لكن بعد وصولنا بيوماين حس بشوية د الحمى .. و مشا عند طبيب بريفي للي قالو مافيك والو و المصيبة انه اعطاه انتيبيوتيك". وزادت موضحة "شرب الدوا ديالو مسكين كامل .. واخا هيداك بقات فيه شوية د الحمى لكن كيتحرك عادي و كياكول عادي ...شبر وهبط نسبيطار السانية د الرمل .. دوزولو عادي قالولو غير مشي مافيك والو .. رجع فحالو نالدار موراها بشي 3 ايام تزاد عليه الحال شوية عاود شبر و هبط نالسانية د الرمل و قالوم دوزولي نعراف شني فيا بما ان الوباء انتشر خصني نعرف شني فيا .. دوزلو الطبيب قالو مافيك والو الحس د كورونا ما كاينشي وناض الطبيب و ذرعو وقالو ها الدليل انا كنذرعك واش غنغامر براسي !!( الناس كيعملو الراديو و السكانير و التحاليل وهو كيذرع ) قالو غير كول مزيان و صافي مافيك والو ". شقيقة ضحية كورونا أردفت في تدوينتها المطولة قائلة "رجع فحالو نالدار فالليلة للي كان الاب ديالي يلفظ انفاسه حس بإعياء شديد لكن ماقدارشي يمشي نالطبيب كان مفتون مع الأب ديالي الله يرحمو .. حيت توفى الأب ديالي و تدفن ( وهادي واحد الحاجة للي زادت حرقاتو لأنه كان خصو يدفن الاب ديالنا بيدو كيف ما دفن الأم ديالنا بيدو ) لكن غدا من الدفن تزاد عليه الحال عيطو نالاسعاف داواه .. اول مرة قالولنا فيه تسمم والرية ديالو ترزات بالمكروب على حسب تعطل ما تعالج من التسمم .. و انا للي كان كيسقسيني كنقولو التسمم و كنجاوب على هاد الأساس و على نيتي و الله على ما أقول شهيد .. من بعد قالو غيعملو التحليلة الاول د كورونا و خرجت النتيجة سلبية و فرحنا و طمأنا نوعا ما .. لكن واخا هيداك بقاو شاكين و قالو يعاودوها و خرجت سلبية للمرة الثانية ..كل هذا و اخي ماشي فوعيو طبعا .. قالو غيعاودو الثالثة و خرجت سلبية .. و اقسم بالله العظيم كانت كدخرج سلبية و صديقة مقربة عندي و تقة كيف ما كانت كد قرا نتيجة التحليل كد خبرني فالحال كد قولي خاك مافيهشي كورونا النتائج كد خرج سلبية ..". وتابعت "لكن البارح عملولو دياليز على اساس التسمم وصالو نالكلى ..و عاد شكو و عاودولو التحاليل و للأسف خرجت إجابية لكن كان فات الفوت فالحبيب ديالي .. و للي كان كيزيد يأكدلنا بأنه مافيه والو هو انه عائلتو و المحيط ديالو حتى شي حد ما بانت فيه شي أعراض لله الحمد و المنة .. ما عرفو النتيجة الاخيرة حتى كان فات الفوت .. ما عندي علاش نكذب او نخبع و نقول تسمم". وختمت كلامها بالقول "المرض و الابتلاء كلشي من عند الله .. و الله سبحانه اختاره يمشي عندو شهيد بإذن الواحد الأحد ..حنا تضربنا جوج ضربات في مدة 10 أيام فقدنا الأب و الأخ فقدرو الله يرحم لكم الوالدين و كفاية من التعليقات و الأسئلة للي كدخل على القلب فحال الخنجر .. الحمد لله على كل حال .. و لا نقول إلا ما يرضي الله و إنا لله و إنا إليه راجعون".
