شو اللي بيصير؟

ما بعرف شو اللي بِِصير
إن كان اليوم ولّلا بكره
إلا ربك القدير
رب الأقصى والصخرة

إيماني طَيّرني فوق
سَكنّي بالعلالي
رفعني بحبال الشوق
للي وحده بالعالي

يا ربي عبدك ضعيف
مبتلى بعالم مجنون
وانت اسمك اللطيف
رحمتك مرهم ودهون

الشعب ببلادي مشبوح
أسير حلمه الافراجْ
ديك بخمّه مذبوح
والسكين بإيد الجاجْ
قالوله يا ديك بيض
بيضة تضمن سلامك
من الميّه طلّع مخيض
بنحققلك أحلامك
الرصاصة خليها بعيد
وحط ببالك هالصورة
مقاومتك ما بتفيد
وتذكر طورا بورا

خلي عقلك ببطنك
وفك حزامك عَ الآخر
وانس شيخك والبطرك
بنفتحلك المعابر

طول ما راسك مرفوع
وعامل ابو شهامة
راح نبكّيك الدم دموع
وتصير أبو ندامة

رد الديك بفخر وصاح
خسيتم يا أنذالِ
من أرضي ما في مراح
لو شنقتوني بعقالي
صوتي حيرافق الصباح
لو طعميتوني زباله

العالم أعور يا غزة
العالم أعوج يا ضفة
شايفك بالعين العورة
عدوك عايش بعزة
وعربك حفرولك جوره
يا قدس لا تسامحينا
بعناك بالسكوتْ
لا تنادي اسامينا
عزيمتنا من بسكوتْ

قسما إنّا خنازير
الانفلونزا أصلها منّا
بنستاهل ضرب الجنازير
وان كان النبي منّا
سنين سنين سنين سنين
واحنا بنقول فلسطين
لو بنستاهلها عن جد
كنا عدناها حطين

اسمعوها كلمة منّي
السلام كلام في كلام
لما للعقل الاحتكام
السلاح وحده بيغنّي