سخرية لاذعة لنشطاء مصريين على ال"فيس بوك" و"تويتر" تعليقا على الجلسة الإفتتاحية لمجلس الشعب: أول القصيدة كفر وآخرها مهلبيه إن شاء الله

تفاعل متابعو ومستخدمو مواقع التواصل الإجتماعي ال"فيس بوك" و"تويتر" مع ما دار في وقائع الجلسة الإفتتاحية لمجلس الشعب يوم أمس الثلاثاء، وعلقوا عليها بمزيج من التعليقات الناقدة وشديدة السخرية، خاصة مع المشادات المتوالية بين رئيس المجلس والنواب الجدد أو بين النواب وبعضهم البعض.
واهتموا بمتابعة أبرز الكلمات الطريفة التي جاءت على لسان من تحدثوا خلال الجلسة، وسط توقعات بأداء سيء ومسرحي للنواب طوال الدورة البرلمانية، فضلا عن الإتهامات الموجهة إليهم بالتراجع عن التمسك عن أهداف ومطالب الثورة.
ومن بين الكتابات التي دونوها:
الإعلامي باسم يوسف يعرب عن سعادته البالغة بانعقاد جلسات مجلس الشعب لأنه كان مهدد بالبطالة والطرد من قناة أون تي في لعدم تقديمه مواضيع كوميدية جديدة.
عااااجل: قناة موجة كوميدي تقدم اعتراض رسمي لإتحاد الإذاعة والتلفزيون وتأكد أن لها الحق في إذاعة جلسات مجلس الشعب حيث أنه لا يخرج عن مجال تخصصها فهي الأحق من باقي القنوات في إذاعتها.
والآن سأذهب لممارسة المذاكرة بما لا يخالف شريعة الله.
محاولة لاغتيال الرئيس المؤقت لمجلس الشعب المصري بالجلطة
أيوة أنا عايزة الراجل ده رئيس جمهورية، مش حنضطر نعمل عليه ثورة، حنتلم عليه ونعلي صوتنا تجيله أزمة قلبية نسقطه، ونشوف اللي بعده في إشارة إلى رئيس مجلس الشعب المؤقت.
رئيس الجلسة: يا عصام بيه اللي بتطلبه ده عييب وحرااام
أول القصيدة كفر وآخرها مهلبيه ان شاء الله
ما يحدث في مجلس الشعب الآن هو يبين ما سيحدث في المستقبل
أقسم بالله العظيم أن هذا البرلمان يمثل جميع عقد النقص عند المصريين من عدم ثقة بالنفس وفذلكة وفهلوة
لو سمحتم لو سمحتم لو سمحتم..... هو الشعار الجديد لبرلمان الثورة
من أول يوم هيضربوا بعض بعد أسبوع هيرموا بعض بالمولوتوف
إنجزوا بقى وسلموها للكتاتني عشان التمثيلية طولت تعليقا على التصويت على اختيار رئيس مجلس الشعب.
لسنا في حاجة إلى عكاشة.. فالبرلمان كله عكاكيش ..
مش هستغرب خالص لو لقيت واحد بيعدي بين الكراسي في البرلمان بيبيع سبح وعطور ومصاحف وكتاب حصن المسلم
الصلاة .. الصلاة يا نواب ”فيما لا يُخالف شرع الله”
مِن حُسني لحسين.. لِمجلس الإخوان والسلفيين ! إنقلوا السُلطة لمجلس الشعب ”فيما لا يُخالف شرع الله” !!!
المقارنة بين اللي بيحصل ده والجلسة الإفتتاحية في تونس مؤلمة
الحقيقة دي ” مقرأة ” مش برلمان
ياما الكوميديا ديه موجودة والثلاثي عكاشة -مرتضي- الشحات مش موجودين أومال لو موجودين كان هايحصل إيه؟؟
فيه ناس بتتفرج عالبرلمان وبتعلّق عالأشكال والأسماء ووو ..زي بنات الإعدادية لما يمسكوا مجلة ويقعدوا يعلقوا عالصور
سيداتي آنساتي سادتي و اللي كان واقف في البلكونة نقوله خليك واقف في البلكونة لحد ما النواب يخلصوا القسم
هو فانديتا هييجي إمتى بقى يفجر المجلس؟؟.. قصدي "بانديتا" عشان الإخوان ما يزعلوش
و دلوقتي تأكدنا إن مجلس الشعب ليس هو الحل
غسان مطر في أولى جلسات مجلس الشعب: أقسم بالله العظيم أن أعمل الصح
النائب بيّبان مِن قَسَمُه !
البرلمان الوحيد في العالم اللي بيقسم على دستور لا وجود له. مفيش فقيه دستوري كان يعدل صيغة القسم؟
أنا جبت علبة آيس كريم و قاعدلكم بأة .. يارب بس تطلع الفرجة عليكوا فيها فايدة في الآخر
مفيش ذكر يهتف يسقط يسقط حكم العسكر
رئيس البرلمان: يا عم الحاج بنقولك التزم بالنص اللي مكتوب .. معلش يا ريس أنا كنت بحط التاتش بتاعي
والله كان ناقص توفيق عكاشة كان طلع قلهم احترم الدستور واكشف الماسونية
ممدوح إسماعيل قالهم أنا أقف ضد كل ما يخالف شرع الله هههههههههه كل واحد لازم يحط التاتش بتاعة
هستنى الحلقة الجاية قصدي الجلسة الجاية بفارغ الصبر وهحضر فواكه مجففة واللب والفيشار ..