زجل .. الى روح شاعر المعرة

ف الأول
كان عندي راس
يدين ورجلين
كسدة
كنت لابس
ايوا بعدا
دازت مدة
درت جناح
جنحين
تغطيت بالريش
كلت نطير
علاش اللي ما نطير
هزيت راسي
هزيتو للفوق
لقيت سلك ديال الضو
قريب مني
جمعت جناحي
طلقت جناحي
طلعت للفوق
عجبني راسي
فوق السلك وقفت
طليت ع الأرض
جاتني الدوخة
زدت للقدام
بحال يلا ف المنام
وانا بصح
زدت للقدام
السما قريبة ليا
البيبان كثار
ندق ف باب
يتحل لي
ما لقيت لا عساسة
لا جردمية
شي ناس واقفين
كل واحد فيهم هاز كاس
الضحكة ف عينيهم
شدات في .
طلقت جناحي
سولت
كلت ليهم فين أنا؟
ما زل الضحكة
هي هي .
زعمت وقلت
مع راسي
علاش نبقى واقف
را الجتة هادي
دير النية
درت النية
حنت راسي
خطيت خطوة
أكثر من خطوة
هما البيبان
تكعدو لي
واحد فيهم شدني من يدي
كال لي انت شاعر
باش عرفتي؟
على وجهك
ف عينيك
بين عينيك
خرج علي
انت شاعر
ما عندك ملة
التاريخ شاهد فيك
من عهد أبو نواس
وكلب المعرة.
كلت وعلاش
هادشي كثير
كثير بزاف
باغيين تخنقوني
تحرقو لساني
وتمشيو فوق ضي عيوني
أنا راجل دغري
كرشي ف ظهري
دري ..... من صغري
عمري نكبر
ولا اللحية ... تنوض لي
صافي
صافي ...... نرجع في حالي
نفسي للفوق
الله ما نرضى بيك
بلا بيك
أنا كاين
وأشعاري
وأحلامي
يلا ما عاجباك
عاجباني
معاي ميزان
كنحط فوق الأوزان
فين ما مالت
الكلمة
تفتح بيبان
هاديك جنتي
هاديك سنتي
وانا امام
من زمان أبي العلاء
الجاحظ
والتوحيدي وانا
شاداني الجدبة
ف يدي خيط رقيق بحال الشعرة
كنركب عليه
كيطاوعني وكيرفعني للفوق
كندق عل البيبان
باش الشوفة تزيان
من زمان/ وانا كانقول
الناس معاي/ ماشي غول
باش تخاف مني
باش تهرب الناس مني
أنا شاعر
غير كاندوي
غير كانقول
وديك الجنة
بحال هادي
وداك الباب
هاهو معاي
خاصني غا نسد عيني
نحل عيني
كلشي هناي .
سلا 2/4/ 2010