تودَّرتْ في نعاسي

تودرت في نعاسي
ماعرفت نحلم .. أو .. أو ....
قلت نسافر ? نلقاني
نتعاشرو ? نتلفو الوقت
يمشي يسبقنا للكناش .
واحد مني يسقي
وواحد مني يشكي
.......
عذبنا الكاس- وما بخلش بدمو
........
تسيفت يا بنت الكلام
لابسة ظلك
نقصت الشمع لا يحرقك
وحريقو يطليك
ما نريدك لوحة بدموع الشمع
وانتِ بلغت تكوني قصيدة
راكبة عود مجنَّح
ملجماه بالخَيال
ومسرجاه بالنور
......تخابلت أنا معايا
والكاس تنوَّى
تخابلتِ انتِ مع القصيدة
والحروف نايضة.
باش نقول عليَّ ? عليك،
تسلَّفت من راسي شي تويشيات :
مات الكاس وبقيت أنا
نفرَّق و نلاقي،
غيْبَتْني نظراتك
وشفرك كان لي ساقي .
........
.........
وقع ما وقع
ولاش نعرف آش وقع ؟
..........
..........
رميت الشبكة على القصيدة
( ما عرفت شكون هي فيكم ؟ )
وتخبلو في يدي الحروف
زاوقت باللوحة محنشة
وبقاو في عنقك الحروف.
هربتِ للميزان ? بيناتنا
حطيتِ راسك وزنة والكلام صروف
..........
..........
الحروف اللي لاقاو مانا يفاصلونا...
الحروف سلالم السما،
اختاري نطلع لك،
أو تبقاي في الكفة نوزنك ....
........
........
لبسي الكلام ....
جسد ? قفطانو الحروف،
الشايف يعمى
والعمى يشوف .
.............
.............
وقبل هاذ « سِفر التكوين «
وبْلان أَيِسان تَكْنِوين، *
خَلِّ ابَّا احمد يشوف .
فجر 03 - 7 - 2012
وبْلان أَيِسان تَكْنِوين : جملة باللغة الأمازيغية وتعني وبدون أن يعلم تكنوين
(عبد الحكيم تكنوين شاعر ومدير مهرجان تماويت للموسيقى والشعر في ورزازات