حديث الزلافة الحريرية الرمضانية "" في وصف العجب العجاب وسب الذباب (الحلقة الثامنة) جائزة قناة الحريرة للأفلام الخاسرة
بطولة : حبوب الدنفراوي سيناريو وحوار : محمد القصة : سعيد الإخراج : الوافي اللقطات الخارجية : حميدو المسالي قبو الموسيقى التصويرية : علال النفار إنتاج : دار المصائب للأفلام المزورة
بعد العياذ بالله من الشيطان الرجيم والصلاة والسلام على سيدنا محمد سيد الخلق وخاتم النبيئين و المرسلين صلى الله عليه وسلم وعلى آله وصحبه أجمعين. قرقبوا عليها سوارت الربح ولي ما صلى على النبي يمشي لجهنم.
يا سادة ياكرام زلافتنا اليوم حكايتها غريبة ومعانيها غارقة وعجيبة حكاية أمة مشكولة بالضمة والفتحة والسكون أمة كثرت فيها العيون والبرقاقا وقشور البانان والصابون كان يا ماكن يا السيادي.. وفأيام الله رمضان وبعدما توكلنا ونوينا الفطور.. دخلات للدار دبانة شوشات علينا القعدة وحرمات بونا من الجلوس على الميدة معانا .. دارت الدبانة وزنزنات.. قلنا ما كاين باس مخلوق تيترزق دبا تخرج وتريحنا. لكن الدبانة كان باين عليها شبعانة .. جاية وناوية تشتت لينا الشمل .. والله ينجيكم من الدبان إلى جهل.. ومع آذان المغرب والموذن يقول الله أكبر .. غابت الدبانة وما بقات تبان.. قلنا الحمد لله ريحاتنا وعطاتنا الأمان.. اجلسنا على الميدة .. عيطنا للجار وأهل الدار وتقادو الولاد وكمل الشيباني صلاتو وقلنا باسم الله بلي قسم الله اسمعنا بالباب خبطة.. والدقان كي التهراس .. قلنا شكون قالو الشرطة .. قلنا الله يحضر الباس..الشرطة ولات تدق الباب .. الله يجعلها حيلة وسباب .. دخلو الدار و بداو فالسؤال
- وصلاتنا أخبار أنكم معتقلين دبانة .. دبانة من سلالة عريقة .. عندها جنيحات ملونة وعويناتها واسعين وكبار وعندها ودنين تتجيب كل الأخبار - الله وأعلم آسيدي .. الدبان كثير وكيفاش غادي نفرقو بين دبانا ودبانكم - دبانا معروفة عليه الأمانة .. وعدم الخيانة .. والسرعة في نقل الأخبار - وعلا حنا خونة .. أو الدبان عندكم أهم من الإنسان .. ؟ - نتا باين عليك ما ربيش وخاصك شي ليلة في لاكاف آ الحمار
- الله يلعن بوها ديموقراطية .. آشكون إلي سلطكوم عليا .. كنت ناوي على فطوري أنا ووليداتي .. مهرسين الباب عليا وجايين تقلبو على دبانا زغبية.. واش ما بقاو فالمغرب شفارة .. ما بقالو فالمغرب أجانب كيستغلو الأطفال .. ما بقاو فالمغرب حكام تيشدو الرشوة .. ما بقاو فالمغرب أغنياء ما كايدفعو ضرائب .. ما بقاو فالمغرب عيالات تيديرو شبكات للزنا والمخدرات .. الدنيا كلها وقفات وما بقى عندكم شغال غير تقلبو على لالا الدبانة فين مشات وفين جات.. دخلت عليكم بالله لاما تتفارقو مني.. - آسمع آ الشريف .. عندنا إذن بالتفتيش في كل الطناجر والزلايف .. والإذن رسمي كيما راك شايف - فتشو آولدي .. قلبو على دبانتكم ودرقو عليا زلافتكم
دخلو للكوزينا طيحو المواعن لموي مسكينة وفاتو لوسط الدار .. تكلمو فالراديوات ونقلو التعليمات وتأكدو من الوشايات ورجعو يسولونا
- المعلومات تاعنا صحيحة وتتقول بلي الناس شافو دبانتنا عندكم فالدار - آسيدي ما كدبتوش .. راك شايف حالتنا العيانة حنا والدبان كيف كيف كلنا عايشين في بطانة.. لا مجاري صحية .. لا مرافق تعليمية .. ريحة الخنز مروعا قلوبنا .. والطوب والفيران على الخبز كيسابقنا .. والمعيشة حارة ولينا كنلقطو الرزق كي الضرسا فالكولاب .. واش ما قادكومش هاذ العذاب باغيين تخوفونا حتى من الناموس والذباب.. وشكون يضمنلينا بلي ما راكمش مخدمين معاكم حتى المشاش والكلاب. - كلشي خدام معانا .. وحتى انتا وولادك إلى بغينا نخليوك عبد مشرط الحناك لسيادك - لكن ماشي هادشي علاش تفقنا.. قلنا غادي نتبدلو ونوليو كنحتارمو الإنسان .. ولي غلط يتعاقب بالحجة والبرهان
