الحليب يا لحبيب

الحليب قلبو أبيض بحال قلوب المغاربة اللي ما وسخهم وسخ الدنيا.. المغاربة اللي قلوبهم حليب، وما باغيين يحلبوا خيرات بلادهم حليب، حيت خلقهم الله بقلوب بيضا حليب، وقانعة، طامحة، ما طامعة.. إلى شافت الخير شابعة، وإلى مسها الخير، للخير ما ما نعة.
الحليب قلبو أبيض بحال قلوب لطفال بسنان لحليب، الحليب بريء ما يعذب مغاربة، كبار ولا صغار، حيت الحليب حبيب المغاربة، وما شي حكار.
الحليب حنين، بزولة الأم فالمحبة، ومحبة الحليب كاملة، حيت الحليب كامل ما يزيد ما ينقص.. الحليب بياض لوقار، ما يرقص، ما يحركوا وتار، الحليب ما يظلم ما يظلم، الحليب نهار، وضو النهار فالنهار، الحليب حكيم، إلى جهلو الجاهلين ما يطلع ما يهود، ما يهزو ريح، ما يتهول، ما يجهل ما يسعر، حيت الحليب حكيم ولبيب واللي جهل وبغى يغدر يكولها.
واش غادي يكول، اللي حرم رضيع من لبزول والرضيع بلا سنان، ما كاد على تهراس الفول، يطلع من ساسو مسوس مأكول. واش غادي يكول اللي زاد القهوة كحول، وزاد فالليل ليول.. وفطم أمة، وغممها غمة.. تفيق على قهوة كحلة زحلة، وتبات على ليلة مليلة.. والأمة كاملة ومكملة، زادوها، حتى لحليب حبيبها، ردوه حبل، به ولات مكبلة. الحليب ليف في ساس الحياة، وليف ف بداية النهار، وبلا حليب كان الحياة تنهار، والنهار ينهار.
يا الزايد فالحليب رد بالك للنقصان، بياض لحليب ما يقبل وسخ.. وللي وسخو بلارج يتمسخ، واخا يلبس زوج جلالب قهوة حليب، واحدة بيضة وحدة كحلة.. يرد الله مسخو وحلة.. ما يفكها فكاك، حيت اللي يزيد يريب فساس الحياة، باغي للحياة لهلاك.
يا لحليب يا لحبيب..
للي وسخوك راهم وسخوها..
راهم تمسخو.. راهم مسخوها..
وإلى بقى فيها شي حلم؟...
دابا نشوفو صورتك فالقمر يا لحبيب.