محاولة زجلية

الزمان الزين يبان من
النهار الزين يبان من صباحو
وكل صباح بعينيهم علينا شاحو
شكون دّاها فالنايح بنواحو
هاد الزمان فيه ضارب الدّف وفيه شطّاحو
وفيه شحال من مظلوم فالزبّالة لاحو
غير حلان الفم والحقيقة ما باحو
/////////////////////////////////////
المخزن عارف الحداثي شطّابتو برّاحو
يصفق يضحك راكع ويمشي مع رياحو
عندو ماضي نساه ينسى جراحو
يحفّظ التعاليم بلواح المخزن ماشي لواحو
خاشع ساجد يسبّح بسباحو
الحداثيين داخو فدنيا المخزن ساحو
ها الضارب البندير ففراحو
ها المكذب الامراض وشحال طاحو
يكُول الدنيا هانيا عيشو ورتاحو
شوفو خدودكم كيف صحاحو
اللي كذّب, ارقام الحليمي فين راحو؟
شوفو يا خوتي هاد الناس شحال قباحو
ياكلو الغلّة ويرميو السلّة ويكَولو ريوسنا قساحو
هما الفرّان الشاوي وهما طرّاحو
الانتهازي الوصولي كثر نباحو
يا خوتي ايام السبعينيات وفين راحو؟
////////////////////////////////////////
النهار الزين يبان من مساتو
شوفو الكادح طول النهار وما يجيب عشاتو
وجهو شاحب كحل كيف يلقى وليداتو
تصبّن وتجفّف فالديور هادي مراتو
يدّيها خاويا حبيبات عدس هداتو
ولدها يبكي برد وجوع فبطانيا مقطعا لواتو
تشجّع راجلها وبكلامها قواّتو
يا راجلي بحر الدنيا هايج وانت حوّاتو
شوفو الكادح المسحوق سياسة المخزن عرّاتو
//////////////////////////////////////
النهار الزين يبان من جولاتو
الواحد ما يعرف الضربة منين جاتو
لا سياسة الغدا غدّاتو
ولا سياسة الضو ضواتو
ولا السكن سكناتو
يعيش تحت ميكة وفالزنقة رماتو
كيف يدير الواحد منّا يعيش حياتو
هادي سياسة جبد الحبل الكادح شنقاتو
///////////////////////////
الزمان الزين يبان من الشيح والريح
وزمان الشطيح والرديح
والكدوب صحيح ومليح
واللي ناض بضربة يطيح
النقابة ناعسة وتصيح
وشي احزاب واكلة وتنبح نبيح
يلا تكلمتي حقوق يرميك بالقيح
يحرم هادي وهادي يبيح
شوفو على سياسة الزفوط والتسنطيح
//////////////////////////
الزمان الزين يبان من التحرحير
هاكاوا على الكمانجة والبندير
المغرب كوللو مدن بلا قزدير
ولا الناس تركب على لحمير
ولا الناس فالادارات التجرجير
ولا حرفة دهن السير يسير
ولا المسؤول عاطيها للماكلة والشخير
ولا حقك فرمشة عين يطير
ولا الدوا بطريقة التبوخير
كولشي ناعس عالحرير
كولشي عايش مفركس وبخير
الاقتصاد حرّوه تحرير
ما بقاتش ماكلة الشعير
اللي بغا ياكل للمريكان يطير
/////////////////////////////////////////////
الزمان الزين يبان من حواراتو
وشي نقابات التنسيق نسقاتو
ومن واقعو ومضمونو فرّغاتو
ما عندها قوة حيت ملفها ما سواتو
النقابة تابعة لحزب والملف سيساتو
اللي كًًٌََََََُُال علاش كيفاش يد الغش صرفقاتو
هو المهدب المصرفق يصرفق يتهدبو وليداتو
هو الابوي عارف كيف يفرّق عريشاتو
لعروش هو جدرها طالعا فسماتو
وعلاش لا وهي من العدو حماتو
كون شحال هادي الطبقة العاملة رماتو
يكّّول اللي باغي يخدم رسمي يغمّض عويناتو
ما يتكلم ما يسمع و يسد وديناتو
مصيرو الطرد يلا نقابة خرى نقباتو
ها سميسي ريجي وكيف الملف حلاتو
والتنقيب لحلو الزين بسميتو سمّاتو
حيت الصراع المصيري بالخلع طلقاتو
واللي كال اوكي وي من خيراتها سقاتو
البيروقراطية المغلغلة فالسما علّاتو
شوفو ملف سميسي ريجي وكيف كرهاتو
شوفو العامل النقابة فحقوقو هضماتو
شوفو العامل النقابة بالتسويفات لواتو
تنشر البيانات فرحانة والعاطي عطاتو