نحسبك بخشيبات الحياة

شحال من راس
يراري بوحدو
كل ما جا لليل
تخبل خيوطو
هنا- لهيه-
واش بنادم راسو ليه.
***
وخا أنت مهزوز فو ق كسدتي
مغروس ف زاوية هبالي
أنت ثلث الخالي
مرة صخرة
صحرا
مرة ويدان معمرا
آه لو يعرفو شنو فراسي!!
حماقي ..هبالي
اليوم غدا… بعد غدا
دور ودور..دور ودور
مرا نخاف
اييه نخاف
نشيخ يا راسي
ويدور هاذ الراس
حافي خاوي
قالو راسي زهايمر
ما يعرف وجوه ناس
مايعرف بسمات
وشلا سميات
نخاف
ايجي نهار أو تعيا
يا رسي
تدور حتى أنت
حافي خاوي….
***
اليوم… يا راسي
جيت انفك خبالك
نحسبك..
بخشيبات الحياة
شحال كَلتي من لا..
شحال تحنيتي
شحال من طيحا
على كتاف
طحتي
شحال ترفعتي عالي
شحال كان جنونك خيل هائج
وشحال يا راسي رمتيني
مرة
كبة صوف
مرة حرقتني غابة على قد الشوف
مرة لبستني جناح كيف الطير
مرة كحلتي عيوني بسواد الليل
كيف نثق بيك يارسي
بين موجة وموجة
بين طلعة وهبطة
بين كاس هبال
رقصة مرساوي
وألف موال
هنا يعوي هاذ الراس
ونكوليه
أش خبارك ياراسي
***
راسي ما بين هاذ الريوس
راس معلق
على باب المحروق
على سوار شلا مدون
يذكر الناس للي نسات
بعام سيبة
الحركة سلطان مول هيبة
سطوة حكام لقبيلة.
راس مدفون فبلاد
وكسدة فبلاد
راس مجهول غريب
راس باقي تيخمم
شكون هو كحل الراس.؟
منين تاتجي قصوحية الراس؟
شكون لردم سنان هاذ الراس؟
شحال تهرس من الراس؟
باش تبقى .. ونبقى
باش تكبر و نكبر
باش تشوف أنت البحر
وأنا نغبر
تحت الأرض
وأنا راسي بين الريوس
يهلل/يشتم/ يخمم/يفسخ/يربط/يبني /يهدم
ومن يعيا
يشد حبل يحزم بيه
الدقة للي جات
لهاذ الراس
كحل الراس
وكلشي
وأنا مع راسي
كَلتها راسي
فيقت راسي
ضحكت مع راسي
وبكيت شلا بكى على راسي