غير داوي

علودي ضْرَبْنا بالعين

علودي ضْرَبْنا بالعين
لعل الجمهور الرجاوي هو أكثر الجماهير المغربية شوقا إلى اليوم الأخير من رمضان، باغينو غير إمتى يسالي· ليس ذلك تذمرا من هذا الشهر الفضيل حاشا لله بل شوقا إلى معانقة النجم سفيان علودي· لأن الخبراء أكدوا أن هذا اللاعب الأخضر لن يستأنف تداريبه إلا بعد إنتهاء شهر الغفران، وعندها سيكون للرجاويين عيدان: عيد الفطر وعيد استقبال علودي·
غادي إن شاء الله نشوفو الراجا كتستقبل علودي كيما استقبلات ريال مدريد كريستيانو رونالدو·
مالك جهلتي؟ واش واحد مْسيني بخمسة وتسعين مليون أورو بحال واحد سينا بصفر سنتيم؟
والله حتى علودي كان غادي يكون أحسن من رونالدو، غير حنا المغاربة ضربْناه بالعين·
راه دابا ملّي ما ولاّش، هو اللي ضربنا ب >العين<·
طبعا، العين هنا يعنون بها فريق العين الإماراتي الذي أعار علودي إلى فريق الرجاء بزيرو سنتيم في عملية وصفها البعض بأنها ضربة قاسية قاسية لسمعتنا الكروية، ورأوا في مبررات الإعارة إهانة للرجاء البيضاوي ولكل أجهزتنا الكروية· ذلك أن علودي ومسؤولي العين الإماراتي صرحوا بأن هذه الإعارة هي فقط مناسبة ليستعيد اللاعب عافيته ويتمكن من الشفاء ليعود إلى اللعب في الدوري الإماراتي·
وملّي علودي باقي مريض، علاش سينا مع الراجا؟
جابوه يلعب هنا الماتشات باش يتشافى، عاد يردوه هوما العام الجاي· مْعا هو مريض ما يقدرش يلعب لهيه، ولكن يقدر يلعب هنا في البطولة ديالنا·
ومالنا قالو ليهم حنا كنلعبو الكورة بالعكاكز؟
إذا كانت حالة علودي الصحية لا تؤهله ليلعب في صفوف فريق على قد الحال كالعين، فكيف تؤهله ليلعب في صفوف فريق كبير من حجم الرجاء البيضاوي بطل المغرب؟ واش زعما حنا المدافعين عندنا كيلعبو بالبلاغي؟ لو كان الغرض الحقيقي هو تسريع وثيرة شفاء علودي من الإصابة، كان الأولى أن يبقى في الملاعب الإماراتية لأنها صالحة لمداعبة الكرة، يلعب فيها غير دقة دقة· بينما التيرانات عندنا كون بصح كنا كنطبقو القانون كون عَمّرْنا الكازون غير بالبلايك ديال الإنتباه: إنتباه حفرة، إنتباه ضاية، إنتباه سقوط الحجر، إنتباه طريق غادا وكتضياق عل ليمن·· واش لعّابة صحاح وكتلوى ليهم رجليهم في شي حفرة، كيفاش علودي غادي يصح فيها وهو أصلا مْوَعّتْ؟
مالك أصاحبي ماكتفهمش؟ راه المرض ديالو بْسيشيك، خاصو يدخل البلاد وسط الفاميلة وولاد الدرب باش يصح·
آه فهمت، المرض ديالو نفسي· ودخل المغرب باش يصح؟
هانتَ فهمتي· كيف قال هو نيت: هداك الشي في الراس ديالو ماشي في رجليه·
ودابا هانا هانتَ، إيلا كان في الإمارات بقى عندو شي فْريّخ في راسو، غادي يوصل للكارة يْطير ليه·
من ذا سيصدق أن البطولة المغربية بملاعبها وبرمجتها ومسيري فرقها يمكنها أن تساهم في العلاج النفسي للاعبين· فلو أجري فحص مجاني لكل لاعبي البطولة الوطنية بقِسمَيها سنجد أن نسبة كبيرة جدا من اللاعبين يعانون من أزمات نفسية وهم لا يعرفون· حيت ما يمكنش مثلا لاعب يعض لاربيط ديال التوش من حاجبو وغادي يكون نورمال؟ هاد الشي بلا مَاندْوِيوْ على اللعابة ديال الهواة، واللي شاف شي يقول الله يستر·
وأنت شفتي غير اللعابة اللي عندهم أزمات نفسية، ماشفتيش المسؤولين ديالنا؟
لا، ماشفتهمش· حيت ما بقيتش كنمشي لطرانت سيس·