شوفو آش غادي يوقع إذا نجح "بايدن" في المغرب والسعودية ومصر والإمارات

انتخابات مشوقة غير مسبوقة ف مريكان، ترامب قريب من الهزيمة وبايدن جو قريب يدخل للبيت الأبيض. تا حاجة ممحسوماش دبا.
في حالة فوز بايدن ف الانتخابات شنو غادي يتغير ف السياسة الدولية، فالقضايا المثيرة للجدل من قبيل : الإرهاب، الصراع الاسرائيلي الفلسطيني، قضية الصحراء، العلاقة مع الاسلاميين، السيسي فمصر والاخوان، صفقات التسلح لي واعد بها ترامب صحابو فالشرق الأوسط (بنسلمان وبنزايد)؟.
خبير مغربي مطلع على خبايا صناع القرار في أمريكا، هضر مع "كود" على مختلف هذه القضايا، والفرق بين بايدن وترامب، وشنو لي غادي يتغير ف4 سنوات المقبلة (في حالة ربح بايدن طبعا).
"كود" جمعات أهم الخلاصات ديال التوجهات لي غاتوقع فالسياسة الدولية ديال مريكان، كيف وضحها لينا الخبير المغربي في الشؤون الأمريكية:
1/ عكس ترامب لي كيفضل العلاقات الشخصية والمصالح الذاتية ديالو على الأمن القومي ديال مريكان: بايدن غايمشي يرجع للعلاقات التقليدية، يرجع للعقلانية للتقاليد العريقة فالسياسة الدولية، بمعنى مغايبقا بنسلمان ولا بنزايد صحاب مريكان.
نزيدو نوضحو هادشيلي دار ترامب مع بنسلمان (الحاكم الحقيقي فالسعودية) وبنزايد (الحاكم الحقيقي في الامارات)، و"عطيني نعطيك" ف قضية اغتيال الصحفي خاشقجي، المال مقابل تفادي الضغط الأمريكي، صفقة دارها ترامب مع بنسلمان.
هنا خضع ترامب الامن القومي يال مريكان لصفقة "عطيني نعطيك".
2/ حقوق الانسان وحقوق المثليين: عكس ترامب هادشي ماشي أولوياته، ترامب مع المحافظين الدينيين، ضد هاد الحقوق الكونية، مكيهموش مصر طحن المحتجين، مكيهموش الاعتقالات السياسية وقمع حرية الصحافة فالعالم ولا فالشرق الأوسط ولا فشمال افريقيا. لكن مع بايدن غايكونو هاد الموضوع على رأس الأولويات طبعا وفقا لمصالح أمريكا.
3/ عكس ترامب مرة أخرى، بايدن عندو فريق متمكن في العلاقات الدولية، ماشي البيزنس لي دار ترامب. ويقدر كاع يجيب شي وحدين واعرين فالسياسة الخارجية من حزب الجمهوريين واخا ضدو.
4/ إعادة فتح قضية اغتيال خاشقجي ومحاكمة بنسلمان: هاد القضية بدات ف تكساس، لي فيها دعوى قضائية مباشرة ضد بنسلمان، هنا الإدارة الأمريكية غادير حلفاء جدد داخل النظام السعودي. يعني زمن بنسلمان انتهى. وبعبارة أدق :"الضسارة لي داير ليهم ترامب مغاتبقاش" وفق نفس الخبير.
5/ معايير جديدة في التعامل مع السعودية والامارات، صفقات السلاح غاتخضع لمعايير ماشي كيف كيدير ترامب. والمثال على أحدث الطائرات الحربية F35 لي مكاينا عند تا واحد فالشرق الاوسط من غير اسرائيل، ترامب واعد بنلسمان يبيعها له، وكان واعد أردوغان يبيع له ولكن تراجع ف اخير المطاف.
وعد ترامب لبنسلمان مغايدوزش، الصفقة مغاديش تعقد فحالة داز بايدن يقول الخبير.