حوار مع الناطق الرسمي للهاكرز"قوات الردع المغربية"

شعب بريس- متابعة
في أول خروج إعلامي له يتطرق الناطق الرسمي لقوات الردع المغربية (هاكرز مغاربة) في حوار عن سبب قرصنته لمواقع حكومية جزائرية، كما يشدد في حواره على أن المجموعة ستطال كل من يتطاول على الملك، كما يتحدث عن معطيات عن هؤلاء المحاربين الجدد.

- مالكم مع الجزائر...؟ (بعد لحظة)
قولينا نتا الجزائر مالها معانا؟

-علاش دخلتوا مع الجزائر في هذه" المرحلة بالضبط" في حرب إلكترونية واش ممقتنعيش بالدبلوماسية المغربية ولا كيفاش ؟
احنا مقتانعين بلي الحل لقضية الصحراء والعلاقات المتعكرة بين البلدين بيد الديبلوماسية المغربية وماشي بيدنا حنا بصح ما نقدروش نصبروا وحنا نشوفوا المغرب يتهان أو ملكنا يشتم ونجلسوا نتفرجوا. كانردوا بأسلوب خولو لينا الدستور الجديد: الدفاع الشرعي والفصل 38 من الدستور.

-كيفاش دخلتوا هاد الحرب..؟ واش عندكم آليات خصوصاً أن هذه الحرب أخطر بكثير حسب رأي "المتخصصين "...؟
حنا ما كانسميوهاش حرب لأن الكفة غير متوازنة والفرق بين القدرات شاسع جدا. نفضلوا نسميوها مناوشات أو محاولة جزائرية لحفظ ماء الوجه. وشوف غير نوعية الاختراقات يبان ليك : حنا نخترقوا مواقع حكومية حساسة وهما يردوا باختراق موقع لوصفات الطاجين.

- شكون أنتم ..؟ واش كانت بيناتكم شي حرب خفية بين الهاركز المغربي والجزائري؟
حنا مغاربة كانحتافلوا بعيد المسيرة الخضراء بطريقتنا. وماعندا مشكيل حتا مع شي هاكر بالعكس حنا نحيي كل هاكر أخلاقي. بصح لي يرش المغرب بالماء نرشوا بالنار.

-واش عندكم برنامج عمل مستقبلي.. من أجل إستهداف الجزائر وجبهة البوليزاريو؟
هاد السؤال غادي تعرف الإجابة عليه قريبا عن طريق الصفحة الرسمية فالفيسبوك.

-طيب..علاش خليتو الملك خطب عاد بديتو الحملة ديالكم؟ يعني علاش لم يكن هذا الهجوم من قبل؟
هذاك غي رد بسيط على مقال جريدة الشروق في تحليل لها لخطاب الملك
واللي وصفت المغرب بالمستعمر..وكذلك على تعليقات الجزائريين اللي فيها غي السب والشتم.
حنا المغاربة كانتاقدوا غي النظام الجزائري أما خوتنا الجزائريين كانتمناو ليهم الحرية من بطش "مون جنرال".
ونزيدك حاجة اللي تطاول على ملكنا راه نحرقوه قبل ما يرمش عينيه .

-الخارجية الجزائرية قالت في بيان لها إن الجزائر تشتبه في جهات رسمية مغربية تشتهر بمثل هذه الأعمال العدائية بحيث حدث قبل نحو سنة (نوفمبر 2010) يعني واش أنتم تابعيين لدولة المغربية ولا كيفاش؟
الحكومة الجزائرية معروفة بهاد الأسلوب: تديرها الديبة ويقولوا دارها الديب. حنا ما تابعين لحتا جهة رسمية لا بشكل مباشر ولا بشكل غير مباشر أعظاء الفريق جمعهم الفيسبوك. وكل واحد فينا عندوا عمل ديالوا كاين أساتذة طلبة تقنيين ... فرقتنا الجغرافيا وجمعنا شعار الله الوطن الملك.

-لنتحدث عن الآليات التي تشتغلون بها هل هناك جهة تدعكم مالياً ومعنوياً؟
(يضحك) فكرتينا فنكتة سمعناها فصفحات 20 فبراير قالو بلي الدولة عطاتنا حواسيب جديدة وهواتف من أخر طراز و6000 درهم في الشهر (يضحك) كاين فالمجموعة لي ماعندوش حتى اتصال خاص بالانترنيت حيت ما عندوش 200 درهم باش يعبأ الموديم شهريا. أما بالنسبة للدعم المعنوي فراه كايجينا من عند المغاربة لي كا يزوروا الصفحة ديالنا وكايعلقوا على المقالات اللي كاتهدر على المجموعة.

-علاش لم تتم قرصنة مواقع مغربية إحتجاجاً على النظام المغربي بعد خطاب التاسع من مارس؟
حنا شفنا بأن الخطاب الملكي كان خطوة هامة نحو مغرب أفضل حيت تجاوز كل التوقعات وحتى الأكثر تفاؤلا. وحنا كانتبناو التغيير الهادئ والتدريجي وكانشوفوا بأن الديمقراطية ليست نقطة وصول، بل هي طريق طويل وشاق يستلزم نفس طويل وعمل على جميع المستويات الفوقي والتحتي. ونحن على يقين تام بأن من لم يعجبه الخطاب الملكي لن يعجبه إلا سقوط النظام ويظهر ذلك جليا من خلال سياسة التأزيم والرفع المستمر لسقف المطالب ناهيك عن الاديولوجيات السائدة والتي لم تكن يوما لترضى بالملكية كنظام حكم حتى ولو كانت ملكية صورية.

-طيب، لنقول أنكم مغاربة تدافعون على الصحراء المغربية لماذا لم تتوجهوا إلى جبهة البوليساريو مباشرة؟
جبهة والسنطيحة ديال البوليزاريو شبعات عصا من قوات الردع سير سول وكالة الأنباء ديالهم شحال من مرة تفرشخات على يدينا وسير شوف أرشيف ديالنا...البوليساريو عندهم مواقع محتضنة من طرف الجزائر وإسبانيا. واحنا شربناهم العلقم مرارا وتكرارا.


-كيفاش إسترجعتوا مواقع مغربية ثم قرصنتها من طرف الهاركز الجزائري في ظرف قياسي حسب ما أعلنتم عليه؟
المسألة بسيطة مستوانا كبير وماكاينش مجال للمقارنة حنا هاكر أخلاقيين أي موقع مغربي تمس حنا نقوموا بالواجب .
قوات الردع المغربية تنظيم إلكتروني كايفتخر بأنه مغربي وملكي حتى النخاع.
جوج كلمات حنا نموتو على ملكنا وبلادنا.
والكلمة الثانية الصحراء مغربية بغيتو ولا كرهتوا.
ونزيدك الثالتة فابور: رسالة للمغاربة صوتك أمانة سير صوت أمعلم وكون مغربي ساهم فالتنمية ديال بلادك.