زجل : شاطْنِّي بْلْبْدالْ

شاطْنِّي بْلْبْدالْ
====
تْكَلَّمْ بْبْداني ساكْنِّي بلْبْدالْ
تْكَلَّمْ بْبْداني طْليبي بالمُحالْ
موجو ضرب وْولَّى فشطوط كْناني
و ْشكاتْ بشْكوكو مْدونْ وجْبالْ
صارتْ صوراتْ تْتْصافى فذْهاني
هاذ الدنيا شوكة مَدكوكة فْنْعالي
يا رَخْوةْ عَقْلي ياشاطْنِّي بالتَّبْدالْ
الحرفْ صارْ علامة عالمة فْجلالي
تْرخاتْ يدي وسارتْ دْلاهْ بالحْبالْ
كُنْتْ مَلْحَة وذَبْتْ فْماكْ يا إْنساني
وطْلَعْتِ وْحالْ عمَّرتْ بها كيسان
مدى قَبْلكْ جا واد همهم فويداني
و قْبورْ ضاحكة من شبايك لْحيالْ
فيهم الحْجار الباكيةْ من سبايِكْ التيجان
و هاذو اللي راحو مْحمليني تَحْمالْ
مْروحِين فِيَّ لْبْحر لْلُوحالْ
النجمة سْطعات والحالْ مَهْوالْ
***
تْكَلَّم بْبْداني ساكَنِّي بالْتبْدال
تْكَلم بْبْداني طْليبي بالمُحالْ
وين تْروح الرّوح يالْتْروحْ
فين يا الوافي والناس حالْ بْحالْ
تْعالى يا شاطَنِّي باالتَّبْدال
تْعالى تْتْعالى فمقاماتْ وحْوالْ
تْعالى قبل ما تْتخطَّاها خَطْوات فالمُحال
***
يا ويلي وْوَيْلَك أشاطني بالأبْدالْ
صْغات العَتْباتْ لْخَطوات القَفَّالْ
ولا صْغات المْفاتَح فيَد القَفَّال لْقْفالْ
صْغاو الدْلاو الثْقالْ لْهَم لْحْبالْ
ولا صْغات شْفايفْ الشًّارب لُّوحالْ
صْغات لخْروق فنْعايل لْهُبّال
ولا صْغات الحْروفْ فْلواح لْعُقَّال
صغاتْ لْلْهْوالْ دّْخال فْلْجْبالْ
ولا صْغات لْمقالْ جْبال فْلْدخالْ
محمد بازي