اجتماع الما برئاسة محمد السادس. الهمة بان والصديقي غاب

اليوم بان فؤاد عالي الهمة مستشار الملك محمد السادس فاول نشاط بعد مدة. الهمة كان مريض ودوز فترة للعلاج بامريكا ودخل. كان فمرحلة نقاهة واليوم دشن العودة ديالو فالقصر الملكي بالرباط فجلسة عمل ترأسها سيدنا وتخصصات "لتتبع البرنامج الوطني للتزود بالماء الصالح للشرب ومياه السقي 2020-2027".
ايلى كان الهمة بان فهاد الاجتماع فالغائب لكبير عليه هو وزير الفلاحة والصيد البحري والتنمية القروية والمياه والغابات. يعني اجتماع على الما غايب عليه وزير معني بيه بزاف.
هاد الاجتماع حضر ليه الملك والهمة كيف قلنا ورئيس الحكومة عزيز أخنوش ووزير الداخلية عبد الوافي لفتيت، ووزيرة الاقتصاد والمالية نادية فتاح، ووزير التجهيز والماء نزار بركة، ووزيرة الانتقال الطاقي والتنمية المستدامة ليلى بنعلي، والمدير العام للمكتب الوطني للكهرباء والماء الصالح للشرب عبد الرحيم الحافظي.
يعني غياب الصديقي غريب. الوزير معني بزاف بهاد القطاع. اييه التجهيز فشخص وزيرو نزار البركة مكلف بالسدود والوضعية المائية ولكن الصديقي راه حتى هو معني بالحضور اكثر من وزيرة الانتقال الطاقي او المدير العام للمكتب الوطني للكهرباء والماء الصالح للشرب
ياكما هاد الغياب عندو علاقة بالبركة اللي كان دارها سيدنا معاه ومع رئيس الحكومة فرمضان اللي فات؟ يمكن