اش من استاذ جامعي ولا سيدي بوزكري. واش بصاح بيلوط لارام حگر ركاب؟ اللا والقضية فيها مشكلة مع واحد بغى يحيد سروالو

رحلة من لاس بالماس لكازا ديال لارام يوم لخميس 11 ماي 2023 ايام منوضة الصداع. القصة فيها لحد الان رواية وحدة ديال 5 ركاب نزلاتهم "لاگوارديا سيڤيل" ديال مطار لاس بالماس بكناريا. وفق مصدر من "ليبيلوط" ديال لارام ل"كود" فرواية هاد الناس كذوب.
وفق مصدر "كود" كلشي بدا باش واحد كيقدم راسو استاذ جامعي بوقاحة مشى لبلاصة ماشي بلاصتو. راكب فكار عريبات. المشكلة يؤكد مصدر "كود" ماشي حتى تبدل ما تبدل واخا هاد الشي ما فيهش ملاغة فجميع شركات الطيران فالعالم٬ المشكل ان مضيفة هاد الطيارة "أ تي ار" قالت لهاد الزبون٬ رجع لبلاصتك. السبب هو انو برك فكرسي فيه منفد للطوارئ. "ايسي دو سوكور" كيجلس فيه شي حد يقدر يعاون ايلى وقعات شي حاجة. خاصو يكون فكامل قواه وما كيعانيش من شي مرض.
مصدر "كود" اضاف باللي باش قالت ليه نوض بقى كيردد "راني مريض" ووو ووصلات بيه حتى قال ليها "واش بغيتي نحيد سروالي باش تتأكدي". هنا اكد مصدر "كود" جا البيلوط واتصل بالسلطات المحلية فتطبيق للقانون.
مصدر "كود" اضاف باللي داك الاستاذ باش شاف القضية صعيبة عاد بغى يبدل لبلاصة ولكن هاد الشي جا معطل. المصدر اكد باللي البيلوط دافع علي المضيفة وطبق القانون ولا شيء غير القانون
هاد الرحلة كنعرفها مزيان. فيها وقاحة لركاب. كاين تهاون من بعض البيلوط. نفس لكليان باش كيركبو مع "بينتر" وهي شركة كدير لاس بالماس ومدن مغربية بحال لعيون وكازا وكلميم ومراكش واكادير...كيبانو ليه لمغاربة داخلين سوق ريوسهم. فين ما قالو ليهم ركبو يركبو. كيعطيهم كاس الما بلاستيك وشي شوكلاطة صغيرة وكلشي حادر الراس. نفس الزبناء ولكن كيكونو ضاسرين مع الشركة الوطنية
لارام خاصها طبق القانون. اللي دار لبسالة يكون استاذ جامعي او ملايري اللي ما بركش فبلاصتو فحال اي طيارة فالعالم خاص البوليس يجي ينزلو.
مصدر "كود" قال باللي اللي نزلو ما كانوش معنيين بهاد الشي. القضية كان فيها شخص واحد ولكن لخراين اللي كانو تماك فكناريا٬ تضامنو معاه.