سكوب. صگع هاد وهبي. بعد تصرفيقة الكورة عند الملك للعفو على ناس الريف كلاشاه وزير الداخلية على ميرسديس الولاة: راه كيخدمو ليل ونهار ما كيدخلوش لديورهم مع الربعة دالعشية

وزير العدل عبد اللطيف وهبي داز عليه شهر كحل. الزغبي كيصحاب ليه غير اجي وفمي وهدر. راه وزير فحكومة وعندو مسؤولية كبيرة وخاصو يعرف اش كيخرج. وفق معطيات حصلت عليها "كود" فان وزير الداخلية عبد الوافي لفتيت تقلق بزاف على تصريح وهبي قال فيه "كيف يعقل ان رؤساء المحاكم والوكلاء العامون للملك ووكلاء الملك عندهم طونوبيلات مخرششة والوالي والعامل كيركبو على ميرسديس".
هاد الشي رد عليه لفيت وفق مصدر "كود" وما عجبوش الحال انو يهاجم الولاة والعمال اللي خدمو كيخدمو ليل ونهار من اول يوم فهاد الجايحة. سكتو باش قال ليه راه ماشي كيدخلو لديورهم مع الربعة.
وا دابا هاد وهبي طلع سياسي ضعيف. قبل هاد الشي كان دار زبلة كبر. باش مشى لبرنامج فدوزيم وقال باللي الكورة ديال العفو على ناس حراك الريف بيد الملك. ديك الليلة سمع اللي ينقي ليه وذنيه. ولكن ما بغاش يتعلم. عرف باللي قودها مزيان وخرج كيشرح ويفسر ويتراجع على كلامو. رجعوه كلون صافي.