كيف توقعات استطلاعات الرأي فالصبليون٬ ربحات المعارضة اليمينية الانتخابات البلدية والجهوية اللي دارت البارح الاحد 28 ماي 2023. هاد الانتخابات مقدمة للي غادية تكون عليه الانتخابات التشريعية من هنا لاخر العام واللي كتحدد رئاسة الحكومة. يعني ان ايام الاشتراكي رئيس الوزراء بيدرو سانشيث ولات معدودة حسب النتائج اللي نشراتها وسائل الاعلام الصبليونية فالرابح الاكبر ماشي غير الحزب الشعبي من اليمين الكلاسيكي بل "بوكس" اللي هو الحزب اليميني المتطرف٬ راه ولى هو القوة السياسية الثالثة فالبلاد. الحزب الاشتراكي الحاكم اليوم خسر 5 حكومات جهوية وحتى هادوك اللي جا فيهم اللول خاصو تحالف مع احزاب اخرى باش يقدر يرجع٬ باستثناء جهة كاسيا دي لامانشا" ما قدرش الحزب الاشتراكي الحاكم يشكل اغلبية بوحدو. خسارة حليف المغرب الاستراتيجي كانت قاصحة فهاد الانتخابات اللي شملات كل البلديات ال8131 في إسبانيا، أي 35,5 مليون ناخب، والحكومات المحلية في 12 من أصل 17 منطقة إسبانية ذات حكم ذاتي، بما يشمل نحو 18,3 مليون ناخب. وأفاد زعيم المعارضة ألبرتو نونيث فايخو زعيم الحزب الشعبي في ساعة مبكرة من صباح الاثنين إن إسبانيا دخلت حقبة سياسية جديدة. وتابع في خطاب الانتصار "إسبانيا بدأت دورة سياسية جديدة ... إنه انتصار لطريقة مغايرة في السياسة"٬ اما عمدة مدريد اللي بقى محافظ على منصبو بحالو بحال رئيسة جهة مدريد من الحزب الشعبي٬ فاكد فتجمع البارح باللي المرحلة السانشيزية سالات وغادية تبدا مرحلة جديدة لكن الحزب الشعبي واخا ربح ما يقدرش يحكم فعدد من البلديات والجهات =حكومات جهوية= خاصو دعم الحزب اليميني المتطرف "بوكس" ولا تمشي ليه هاد المدن. سبتة ومليلية حتى هي غادي يحكمها الحزب الشعبي. فالمدينتين المحتلتين جا هاد الحزب هو اللول. من نتائج هاد الانتخابات التراجع الكبير ل"بوديموس" اللي هو حليف الحكومة الحالية وهو حزب يساري راديكالي ديما عندو مواقف عدائية ضد المغرب٬ هاد الحزب كان القوة السياسية الثالثة فاسبانيا فالانتخابات الاخيرة٬ دابا تراجع بشكل كبير.
