تنظيم محكم فدونور لإنجاح الفينال بين الوداد والأهلي وها شحال غيكون ديال الجمهور

كلشي فكازا وفالمغرب ومصر وإفريقيا كيتسنى إمتى يبدأ إياب فينال عصبة أبطال إفريقيا بين الوداد الرياضي حامل اللقب والأهلي المصري صاحب أكبر عدد من الألقاب بالمسابقة، واللي غيكون اليوم فستاد دونور مع 8 الليل بتوقيت المغرب.
ملعب مركب محمد الخامس بكازا واجد باش يستاضف العرس النهائي بين الوداد الرياضي ممثل كرة القدم المغربية والمنافس ديالو الأهلي المصري، وكلشي واجد تنظيميا وأمنيا لإنجاح هذا الحفل كيفما هو الأمر ديما ملي كينظم المغرب شي حد رياضي أو فأي مجال، حيث هذا إقامة الأحداث الكبير سوا فالسبور أو غيرها صبح شي حاجة عادية بالنسبة للمغرب.
وبخصوص الجماهير اللي غتحضر ماتش الفينال بين الوداد والأهلي المصري، بالعدد اللي غيكون اليوم بملعب مركب محمد الخامس هو 45 ألف مشجع، وطبعا أغلبهم والنسبة الكبيرة منهم ديال جماهير الوداد، وبالمقابل تم تخصيص 2000 كرسي لجماهير الأهلي المصري، تباعت منهم 500 تذكرة شراوها المسؤولين ديال الأهلي باش فرقوها على جمهورهم.
للإشارة فالمحيط ديال ملعب المركب الرياضي محمد الخامس بالدار البيضاء، كيعرف أجواء استثنائية وكاين تنظيم محكم باش يدوز هذا الحدث في أحسن الظروف، وتوضعو البريارات فالشوارع والزناقي المحيطة بالمركب لضمان سلاسة الدخول إلى التيران، وكذلك باش غير اللي عندو التيكي هو اللي يدخل، واللي ما عندوش يرجع بحالو قبل بمسافة طويلة على بيبان دونور لتفادي الزحام والتدافع وباش كلشي يكون بخير.