السمسار الكبير فضوسي القضاء بكازا.. ها شنو قال ربكو للفرقة الوطنية فالتحقيق و"گود" كتشف التفاصيل ديال لاپيل

بطل ضوسي السمسرة القضائية فكازا، المنتدب القضائي الإقليمي ربكو، نكر ف التحقيق معه أن النمرة ديال التلفون لكتسالي ب79 ديالو، ونفى حتى التصريحات لي دلاو بها المصرحين لاخرين ولي كيقولو بللي هو لي دخل ليهم فملفات ديالهم فالمحاكم باش تفكو ونفى حتى أنه شاد الريالات من عندهم.
مصدر "گود" القريب من دائرة التحقيق كيزيد يأكد على أن ربكو لي ربك الأمور كلها، قال أنه غير كيعاونهم باش يلقاو المحاميين باش ينوبو عليهم في الملفات.
المعني بالأمر مني سمعوه المحققين تسجيلات المكالمات لي ملتاقطة تراجع على كلامو وأكد أن النمرة نمرتو وأنه كيخدم بها فالاتصلات اليومية ديالو مع أفراد عائلتو، وقال إن الصوت لي فالمكالمات صوتو ومبقاش بغا يزيد تا كلمة من بعد.
وعلى حساب المعلومات لي جابت "گود" ربكو فمكالمتو الهاتفية كيتاصل به عصام لي كيبيع البياس لكيخص أشغال الكهرباء، قال ألو وي عصام رد عليه واش المدير، ربكو قاليه حرفيا اه غادي.. شوف بيني وبينك غادي تجيب ليا أنا باش ناخذ والأستاذ ما يعيطش ليه ويعطيني أنا ونعطيوه غير مليون وناخذ أنا 5000 درهم بغيتها ما تناقشنيش وراه اليوم غيربح الملف مع جوج ولله ما نكذب عليك راه قلت ليك أنا الضامن.
وفي نفس المكالمة البطل ديالنا ربكو كيقول لاخور واش نتا تعرفني قوي ولا مقويش يرد عليه عصام لا قوي، وكيأكد عليه باش يجيب ليه 20 ألف درهم ومخصوش يعطيها للأستاذ بل خصو يجيب ليه هو وهو يتكلف...