الوداد طواو صفحة عصبة الأبطال.. الحمرا دارت للبطولة وبدات كتوجد لحسنية أكادير

طوى الوداد الرياضي صفحة عصبة أبطال إفريقيا اللي خسر البارح الأحد اللقب ديالها بعدما تعادل فالفينال بكازا مع الأهلي المصري، ودابا الفريق غيوجه التركيز ديالو للبطولة الاحترافية وكأس العرش.
ومن المنتظر يرجع الوداد الرياضي للتداريب ديالو اليوم الاثنين فتيران بنجلون باش يبدا يوجد للماتش الجاي ديال حسنية أكادير فالبطولة الاحترافية، وغيدير الفريق حصة تدريبة هاد العشية تحت إشراف المدرب زفين فاندنبروك وغيركز فيها الأخير على الجانب النفسي ديال اللاعبين بشكل كبير ويخرجهم من الأجواء السلبية اللي دخلو لها البارح بعد خسارة عصبة أبطال إفريقيا مع الأهلي.
فريق الوداد الرياضي غيخدم كذلك على لافريشور فيزيك، حيث بزاف ديال اللاعبين كيعانيو من العياء، بسبب تراك المباريات والرحلات الطويلة وآخرها السفر إلى القاهرة للعب ذهاب فينال عصبة أبطال إفريقيا والرجوع إلى المغرب مباشرة باش يوجدو للروتور، ودابا الحمرا خاصها تبدا تركز على البطولة الاحترافية وغيسافر الفريق إلى أكادير باش يلعب مع الحسنية يوم الأربعاء الجاي برسم الدورة 27 ، والهدف ديالو هو يربح باش يستغل أي هفوة ديال فريق الجيش الملكي وياخذ منو الصدارة.