موقع مهتم بالتغيرات المناخية فالعالم: نظام الخطارة اقدم واذكى نظام ري فالمغرب قرب ينقرض بسبب الجفاف والسياسة الاقتصادية الجديدة للمغرب

افاد موقع"climate home news" اللي كيهتم بالتغيرات المناخية فالعالم ان اقدم واذكى نظام ري فالمغرب اللي كان قرون هادي قرب ينقرض بسبب المناخ والحرارة.
وأضاف أن السكان ديال جنوب الشرق فالمغرب فحال منطقة اميضرا فقبائل ايت عطا هلكاتهم الحرارة والجفاف وزادت عندهم نسبة الفقر بحيث معظم الناس كيعيشو بأقل من دولار فالنهار.
وأشار ان المنطقة زراعية رعوية عندهم الغنم والماعز والزيتون وخا الشتاء عندهم قليلة متكيفين معاها ومعتمدين على نظام تقليدي لتخزين المياه وتوزيعها قرون هادي، المعروف باسم " الخطارة"، واللي كيعتمدو فيه على سلسلة من القنوات الجوفية لتزويد الحقول الزراعية بالمياه وهو فعال فالمناخات القاحلة وشبه القاحلة.
ولكن مع ارتفاع درجات الحرارة وظروف الجفاف والشركات اللي كتنقب على الفوسفات والفضة فالجنوب والجنوب الشرقي دمرات هاد نظام الري .
وصرح للموقع احد المتضررين ، محمد بومنير ، فلاح فإميضر ، عندو ارض ، كيحصد الزيتون والتمر والكرموس والنبݣ والرمان والفجل، كيقول ان قنوات الخطارة المحفورة يدويا يبسات وفلاحتهم تضررات.
وأضاف أنه فبلاصة نظام الخطارة الجاف ، اضطر بومنير لتركيب أنابيب الري للمساعدة فتوفير المياه، وحتى فلاحين اخرين ركبو الألواح الشمسية والآبار الآلية لضخ المياه من تحت الأرض مضيفا انها كتبقا غالية وماشي كلشي يقدر يديرها.
وقال بومنير ,"هاد التقنيات الجديدة مكتعطيش نفس الغلة فحال نظام الري القديم بحيث الكرموس واللوز والزيتون ولات صغيورة وحتى المذاق ديالها تبدل على قبل".
واشار الموقع أن المغرب ولا رائد فإقتصاد التكنولوجيا الخضراء داخل افريقيا وفالعالم، والمشاريع الرأسمالية الاستخراجية فالجنوب الشرقي ، مثل محطة نور للطاقة الشمسية ، أو تعدين الفضة الضار فإميضر، غير زادت أزمات هاد المناطق وخلات نصهم يهاجرو والنص لاخر بطاليين والحكومة مميكة.
Morocco's centuries-old irrigation system under threat from climate change