عبد الصمد الزلزولي سمح فالعطلة وراجع للبارصا يبين لهم علاش قاد

قرر الدولي المغربي عبد الصمد الزلزولي يسمح فالعطلة ديالو، يرجع يتدرب مع البارصا ويوجد رفقة الفريق للسفر للمريكان باش يستعد للموسم الجاي.
وكشفت جريدة "موندو ديبورتيفو" الإسبانية القريبة بزاف من البارصا، أن النجم المغربي الشاب عبد الصمد الزلزولي قرر يسمح فالعطلة ديالو اللي مازال فيها 2 سيمانات ويرجع للبارصا، باش يوجد معه للموسم الجاي.
وحسب نفس المصدر، فعبد الصمد الزلزولي باغي يبين لمدرب البارصا تشافي هيرنانديز، أن بلاصتو كاينة مع الفريق ومتشبث بالبقاء مع فيه واخا جاو فيه عروض باش ينتقل لفرق أخرى، وغيرجع الاثنين الجاي يتدرب مع البارصا ويوجد للسفر للمعسكر التدريبي فالميريكان.
وأكد نفس المصدر، أن كاينة منافسة قوية عند عبد الصمد الزلزولي وسط البارصا مع فيران توريس واسو فاتي واخا هاد جوج لاعبين ما بقاوش مقنعين، والمدرب تشافي دايرو كخيار أول بالنسبة له وغيعطيه فرص باش يلعب ليماتش اميكو ضمن استعدادا الفريق للموسم الجاي، وحتى النجم المغربي باغي يبين له أنه خاصو يكون فالتشكيلة د البارصا.
وقدم عبد الصمد الزلزولي الموسم الماضي مستوى واعر مع أوساسونا اللي لعب معه بريطي بعدما خرج يقلب على راسو حيث ما بقاوش بلاصتو فالبارصا، ووصل مع المنتخب المغربي إلى دومي فينال مونديال 2022، وقبل أيام من دابا قاد المنتخب الأولمبي للتأهل إلى أولمبياد باريس وربح معه كأس إفريقيا لاقل من 23 عام.