شعلت بين PSG ومبابي وما خلاوهش يسافر مع الفريق لليابان.. واش صافي غيصيفطوه بحالو ؟

نايضة ما بين باريس سان جيرمان الفرنسي والنجم ديالو كيليان مبابي، وشعلت بين الطرفين والمشكل كبر بينهم البارح بالعشية.
شبكة bein sport القطرية، اللي مولاها هو ناصر الخليفي مول باريس سان جيرمان الفرنسي، كشفت ان باريس سان جيرمان استبعد النجم كيليان مبابي من لاليست الفربق المسافرة إلى اليابان، اللي غيدير فيها معسكر تدريبي تحت إشراف المدرب لويس إنريكي.
وكيجي هذا الخبر بعد الايام الماضية اللي توترت فيها العلاقة بين باريس سان جيرمان الفرنسي وكيليان مبابي، حيث الأخير ما باغيش يجدد العقد ديالو معه.
ومدة هذه وباريس سان جيرمان الفرنسي، كيحاوب يقنع مبابي باش يجدد معه حتى صيف 2025، حيث عقد اللاعب غيسالي صيف 2024، وخايف يمشي فابور العام الجاي لريال مدريد الإسباني، داكشي علاش خيرو ما بين يجدد معه أو يبيع العقد ديالو هذا الصيف لأي فريق يقدم أكبر عرض هذا الصيف.