بين مول البارود وولاد الخضرا شكون اللي كيهين الوطن. جمهور هز النشيد الوطني وسط الجزائر ومسكون بوطنو وما عندو الا الباسبور لخضر ولا اليوسفي اللي دار للبلاد ازمة ديبلوماسية وكيتعنى بياسين ومحمد

كاين استهداف واضح لجمهور الراجا. من نهار فينال كأس العرش ضد نهضة بركان وهاد الاستهداف تزاد. هادي كيقولها ودادي فرحان باش الخضرا ما ربحاتش الكاس. لكن المشكلة هو هاد الضرب لادارة الراجا الجديدة. الاستماع ل3 مسؤولين ومواجهتهم مع مشجعي كان تقال باللي قالو ليهم "طلعو للرباط". فاللخر طلع حتى شي مسؤول من الخضرا مسؤول على هاد العبارة "طلع للرباط". الاخطر من هادا تروج اخبار باللي رئيس الرجاء البيضاوي محمد بودريقة تشد. حتى هو كان تسمتامع ليه بعد شكاية قدمها والي الرباط محمد اليعقوبي على اقتحام ملعب مولاي عبد الله فالفينال للتيران. هادي سابقة تستامع لرئيس نادي.
تزاد علي هاد الشي شي تصفار ديال وحدين كانو مع جمهور الخضرا على النشيد الوطني. لكن هاد الشي ما خاصوش الانتقام. ما خاصوش تجرو مسؤولي الرجاء للقضاء وتبهدلوهم. هاد التصفار راه خاصو فهم عميق على الاسباب. علاش جمهور فرقة اي فرقة فالمغرب يصفر على النشيد. هادا راه انذار لينا كاملين. راه غباء كبير تعاقب. غادي غير تخلي اللي يصفرو يكثرو.
النشيد رمز للوطن. اش وقع حتى فئة واخا غير صغيرة بزاف تمس هاد الرمز. من بعد كاينة العصبة اللي ممكن تقدم حلول على معاقبة كل نادي تصرف جمهورو بحال هاكا.
لكن هادا ما كيعنيش ان جمهور الخضرا ضد الوطن. ابدا. هاد الجمهور وطني وما محتاجينش بيان من "كورفا سود"٬ التراس الخضرا٬ دير بيان باش تدين هاد التصرف. راه كل مغربي عارف باللي هاد الجمهور وطني. جمهور مخلص لوطنو. جمهور غنى النشيد الوطني والصحرا المغربية وسط الجزائر. جمهور ديما كيكون حاضر مع بلادو. طبعا فرقتو هي اللولى.
دابا تعالاو نشوفو كيفاش كتقاس الوطنية فهاد لبلاد. واحد لملايري اسمو اليوسفي باه كان خدام مع ادريس البصري وكان مدير لكولف بن سليمان وجمع ثروة كبيرة بزاف وعندو احتكار استيراد البارود. اييه فهاد لبلاد اللي عندنا المنافسة الحرة٬ هاداك مجلس المنافسة خايب منو والحكومة حتى هي وما عندو منافسة بهاد الدومين بالبلاد. هاد اليوسفي تسبب فازمة مع ميريكان باش دخل مدير المدرسة الامريكية اللي عندو كثر من 70 عام لعكاشة وكون ما اتصلش قنصل امريكا بالخارجية كون مازال تماك. ولدو متهم بتصوير فيديو شي بنت والمدرسة الامريكية بكازا عاقباتو. باه دار شهادة طبية من طبيب نفساني وقدم شكاية وباش جاو يستامعو للمدير تابعوه فحالة اعتقال. اييه شوهة لبلادنا. فيها هاد تريكة البصري كيحكم فكلشي. كيتعنى بعلاقاتو مع ياسين المنصوري باطرون "لادجيد". كيتعنى بعلاقاتو مع محمد عبد النباوي الرئيس المنتدب للسلطة القضائية. كيتعنى بعدد من شخصيات لبلاد. كيقولها للحاضر والغايب. يمكن كيكذب. حقاش لا المنصوري ولا عبد النباوي يترافگو مع هاد العينة. هادوك رجالات دولة معروف عليهم الاستقالة والنزاهة. بعاد على هاد العينات.
دابا شكون اللي كيضرب الوطن. شكون اللي بصاح كيضر لبلاد واش جمهور الخضرا ولا مسؤوليها ولا امثال اليوسفي.
المصيبة ان القضية دازت وما تفتح لا تحقيق مع اللي كان سباب باش يدخل الاميركي لعكاشة ولا مع الطبيب النفساني اللي قدم شهادة طبية
ولد اليوسفي اللي دار ثروة ايام البصري وزاد ضاعفها وكيقول باللي كلشي ناس الدولة كتحميه٬ كيضرب الدولة. كيضر الدولة. راه مس ببلاد كلها. هادو اللي خاصهم يتحاسبو ماشي جمهور مسكون بحبو لوطنو ولفرقتو