قتل نورا الرجاوية. الجريمة تعطلات وكان خاصها توقع قبل وغادية تكرر مستقبلا. الحل ساهل وراديكالي: كلشي لفراقي يتحملو مسؤوليتهم فالتيران وممنوع شي حد من القوات العمومية يقرب من ليسطاد وممنوع الدخول حتى تبقى ساعة وكل واحد وبلاصتو

المشجعة الرجاوية نورا ما ماتتش. تقتلات. القاتل معروف. او القتلة معروفين. ما تقتلاتش بعيد على التيران. تقتلات فالتيران. حدا الباب او الداخل بحال بحال فعرف اللي كيتكلف بالاجراءات الامنية للملاعب فالعالم. علاش تقتلات نورا؟ حقاش بزافت المكلفين بالامن والمسؤولين عن تدبير الملاعب ما داروش خدمتهم.
هادي سنوات دارت شركة "سونارجيس" لتدبير ملاعب كرة القدم. تعين فيها اليوم كاتب عام سابق لوزارة التربية الوطنية وواحد من اغبى الاطر فهاد المجال. ما جابوش متخصص. جابو عقلية مخزنية ديال الداخلية.
فشلات هاد السياسة. اييه لحد الان هاد الشركة مازال ما عندهاش مسؤولية تدبير مركب محمد الخامس ومسؤوليتها فملاعب الرباط وفاس واكادير وطنجة ومراكش ولكن شفنا خدمتها وشفنا ضعفها.
بقى مركب محمد الخامس تابع فتدبير جزء منو ل"كازا ايفنت" ولكن تدبير ناقص عرج.
مركب محمد الخامس الداخل ليه فالماتشات لكبار مفقود والخارج منو مولود. كيخليو الدراري الصغار يدخلو. كيخليو اللي كيعطي شي دراهم يدخلو. ولى مدر للدخل لبعض الاشخاص. دور مع هادا وغادي ندور وسير نقز لكرياج. اي حركة خاطئة ممكن تقتل اللي مشى ينقز.
كيفاش تيران يجيه 20 الف او 60 الف بحال بحال. كيفتحو نفس الابواب. كيفاش تيران كيتفتح 6 الى 4 ساعات قبل الماتش. هادا تعذيب لعشاق الملعب. الجوع ولعطش والشمش او البرد. لا طواليطات ماقدين لا ظروف مقادة لاستقبال ادمي لهاد الجمهور.
كلشي فيه البيع والشرا. كلشي من بيع التونيات الى بيع الساندويتشات. كيفاش اندية كتخسر لملاير باش تجيب اللعابة وكيجي شي حد يبيع تونياتها مزورين وداخل التيران. كيفاش بغيتو الراجا او الوداد يجيبو نجوم كبار وما عندهمش الحق حتى يبيعو الما والساندويتشات. كيجي شي حد عندو علاقة بشي التراس ديال التشجيع وياخد هاد المارشيات.
راه الفوضى كلشي عندو دور فيها. النادي ورؤساؤو وومسؤوليه. الدولة ومؤسساتها اللي كتراقب هاد الاندية. القوات العمومية.
راه اهانة لبلاد باغية ترشح لراس العالم تلقى القوات العمومية كتنظم الدخول للملاعب. خاص يتحيد هاد الشي. ممنوع على شي حد من القوات العمومية يقرب من تدبير دخول وخروج الجمهور من الملعب. بحال كاع دول العالم المتحضر٬ البوليس كيحمي خارج الملعب وكيكون واجد يتدخل الى وقع شي مشكل فالملعب وصافي.
شركات امن خاصة تكلفها الاندية =ياك محترفة= تدير حواجز بعيد بزاف علي الملعب باش تراقب اللي عندو التذاكر. خاص يكون حواجز على كيلومتر علي الاقل على الملعب. تبدا عملية التنقية فاللول.
راه اساءة للبلاد تلقي رجال القوات العمومية فالبولوز فالگرادان فالدخلة فالخرجة. اساءة لدور هاد القوات. كيعييوهم ويسخسخوهم بهاد الشي. فالتيران كيكونو غير عدد محدود من مسؤوليهم لكبار. باش ايلي وقعات شي حاجة كيعرفو فين يدخلو
ماشي بصاح ان الدعوات هي المشكل. راه فالعالم كولو كاينة دعوات ولكن محدودة. مثلا فالفضاء ديال "في اي بي" او غيرو كيكون غير للدعوات. ولكن خاص كل دعوة كرسي ديالها. هادي خدمة شركات الامن الخاصة.
اللي قتل نورا او لعب دور فقتلها معروف. ما غادياش تكون اللخرة. غادي يموتو عدد منها ايلى بقينا هواة فتنظيمنا. العاطفة والتبزنيز هي اللي كتحرك علاقتنا بالكورة.