وزير النقل فرش رباعة أساتذة جامعين نوضو صداع فطيارة لارام: هوما لي غلطو والبيلوط دار القانون وجرا على الأستاذ لي مبغاش يجلس فبلاصتو ودار صداع مع مضيفة الطيران

وزير النقل واللوجستيك محمد بنعبد الجليل، زاد فرش رباعة من أساتذة جامعيين قالو بلي تظلمو فالطيارة وتهانو وهبطوهم.
وزير النقل أكد الرواية لي نشرات "كود" وقال بلي الرحلة بين لاس بالماس وكازا بتاريخ 11 ماي 2023، مضيفة الطيران شافت بلي واحد من الركاب مشا جلس فبلاصة ماشي ديالو، والاكثر من ذلك جلس فالجهة لي فيها أبواب الإغاثة والمعروف أنه كيجلسو فيها ناس عندهم القدرة فتسهيل عملية الإجلاء فحال حدوث الطوارئ.
الوزير قال كذلك، بللي هاد الراكب (أستاذ جامعي يا حسرة) مبغاش يبدل بلاصتو ودخل فصداع مع المضيفة، هادشي خلا البيلوط يعطي تعليوماتو باش يهبطوه، وفعلا هبط ومعه 4 أشخاص اخرين (صحابو الأساتذة) تضامنو معه طواعية.
وأكد وزير النقل بلي هادشي لي دار البيلوط قانوني لضمان سلامة الركاب ومرور الرحلة في أحسن الظروف.
وكانت مصادر شرحات ل "كود" كيفاش كلشي بدا فاش واحد كيقدم راسو أستاذ جامعي بوقاحة مشى لبلاصة ماشي بلاصتو. راكب فكار عريبات. المشكلة يؤكد مصدر "كود" ماشي حتى تبدل ما تبدل واخا هاد الشي ما فيهش ملاغة فجميع شركات الطيران فالعالم، المشكل أن مضيفة هاد الطيارة (أ. تي. ار) قالت لهاد الزبون، رجع لبلاصتك. السبب هو انو برك فكرسي فيه منفد للطوارئ.
مصدر "كود" أضاف باللي فاش قالت ليه نوض بقى كيردد "راني مريض"، ووو ووصلات بيه الوقاحة حتى قال ليها "واش بغيتي نحيد سروالي باش تتأكدي"، هنا أكد مصدر "كود" جا البيلوط واتصل بسلطات المطار للي طبقات القانون.
مصدر "كود" أضاف باللي الأستاذ مللي شاف القضية صعيبة عاد بغى يبدل لبلاصة ولكن هاد الشي جا معطل. المصدر أكد باللي البيلوط دافع علي المضيفة وطبق القانون ولا شيء غير القانون.