فين ايامك يا بنهيمة. هاد عدو رجع لارام كار عريبات: فضايح فرحلة لاس بالماس لعيون عندها خطورة على سلامة المسافرين

تحولت الرحلة AT999 البارح الاثنين 23 اكتوبر 2017 والرابطة ما بين لاس بالماس بجزر كاناري الاسبانية ومطار الحسن الاول بالعيون بالجنوب المغربي الى كار عريبات. كلشي فيه كشبه كار ماشي طائرة كتخلي المسافر الزبون يفرح بيها والمواطن ينشط بانتماءها لبلادو. هاد الرحلة اللي خرجات مع الثامنة و20 دقيقة من لاس بالماس خرقات قانون الطيران بزاف.
المضيفات او الشافة ديالهم ارتكبت هاد الفضيحة وسامحات فيها. جوج مسافرين كل واحد هاز معاه 4 من حقائب وصيكان وثقال بزاف. الفضيحة ماشي غير فهاد الشي وصافي اللي ما كاين حتى فشي خطوط كتحترم راسها فالعالم. القانون واضح. حقيبة فيها كيلوات محدودين وحقيبة فيها كمبيوتر والوثائق. هادو غير اللي مطلعين فالطيارة عند كل واحد اكثر من 50 كلغ. تصورو 50 كلغ وراها قليلة مطلعها للطيارة.
لفضيحة اخرى وفق شاهد عيان ل"كود" كانت اخطر على سلامة المسافرين وفيها وقاحة كبيرة "مالين الثقل اللي هما جوج جلسو فالصف الاول فالدرجة الثانية اي الصف 8 وصاحبو برك ف9 وحطو حداهم حوايجهم. ما احتارمو لا البلاصة فالتذكيرة لا قوانين السلامة فالملاحة الجوية فكاع شركات الطيران المحترمة وهي كلشي خاصو يكون فبلاصة الباكاج ماشي فالكراسى.
وباش يكمل هاد الفيلم فعبثيتو جات الاخت المضيفة وقبل ما تقلع الطائرة جابت ليهم قرعة الما سيدي علي وفرقاتها عليهم وعلى صحابهم. كيفاش ربان طائرة يخلي فضايح بحال هاد الشي فطيارة كيقودها وكيفاش لارام فاتت كار عريبات وولات فهاد الحال مع هاد المدير عبد الحميد عدو اللي خرج عليها وعلى صورتها واكيد هاد الفضيحة وفضيحة كندا ديك النهار مسلسل غادي يولي مكسيكي. اللي جابو هاد المدير غاديين يكونو فرحانيين باش يرجعو شركة خرجات من السكتة القلبية ولات مزيان لسابق عهدها.