عادل رمزي: باغيين نشرفو الوداد ولكن الهدف الأول فكأس العرب هو نجرب ونقاد فريق للموسم الجاي

اعتبر عادل رمزي مدرب الوداد الرياضي أن الماتش المقبل ضد الهلال السعودي برسم الجولة الثالثة من دور مجموعات كأس العرب غيكون صعب، وأن الفريق غيعطي اللي عندو باش يتأهل، ولكن راه المسابقة العربية بدرجة أولى هي فرصة باش الواك يوجد للموسم الجاي.
وتحدث عادل رمزي بعد التعادل المخيب الثاني للوداد الرياضي فالبطولة المغربية واللي كان هاد العشية ضد اتحاد طرابلس الليبي بواحد لواحد وقال فتصريح له: "التأهل ما غيتحسم حتى المباراة الأخيرة، كنا كنتمناو نربحو اليوم ولكن مرة أخرى ظروف الماتش، وخاصنا نكونو واقعيين، أنا كنشوف المشروع وراه كاين تحسن كبير على المباراة الأولى فالنظام فالتيران والتحكم فالماتش ولكن باش تربح وتجيب نقاط مازال، حيث كاينين أخطأ تقنية خاصها تحيد ونرفعو من التركيز باش نديرو نتائج إيجابية".
وزاد عادل رمزي ووضح: "لائحة اللاعبين اللي عندنا دابا ماشي هي لاليست فينال وكأس العرب بالنسبة ليا فرصة ذهبية باش نشوف لكروب اللي عندي والخصاص فين كاين، ومن بعد تقوية المجموعة".
وأكد مدرب الوداد وكان واقعي مع الوداديين وقال: "المباراة الثالثة ضد الهلال السعودي هي الصعيبة؛ ولكن إذا كان تحسن الفريق أكثر من الماتش الأول والثاني راه غتكون عندنا فرصة باش نتأهلو، وبالنسبة لجمهور الوداد حنا باغيين نشرفوه؛ ولكن باش نكونو واقعيين راه باقي كنتيستي لكروب، والرباح ديالي الأول هو يكون عندي وضوح على المجموعة د الفريق باش نكونو مستعدين للمنافسات المقبلة".