نهيلة بنزينة: كنا عيالات فالتيران وبيننا باللي المرأة المغربية تقدر تنجح فجميع الميادين

هاد الحوار دار مع نهيلة بنزينة ف"زون ميكس" بعد ما سالى الماتش ضد كولومبيا والتأهل للثمن.
كيفاش عشتي هاد الماتش؟
دابا واخا نوصف ليكم الفرحة اللي فقلبي ما نوصلهاش بكثرة ما انا فرحانة. فرحانة براسي. فرحانة بالبنات الله يعطيكم الصحة. تقاتلنا. كنا رجال فالتيران
اللا كنتو عيالات؟
كنا عيالات اوس 2. بيننا باللي المرأة المغربية تقدر تنجح فجميع المجالات. الحمد لله قدرنا نفوزو. نربحو كولومبيا ونتأهلو للثمن فاول مشاركة لينا فالمونديال
كنتو متوقعات هاد التأهل للدور الثاني فهاد المونديال؟
كنا متفائلات. كيقولو تفاءلو خيرا تجدوه. كنا عازمات نديرو ماتش مزيان. كانت عندنا رغبة نديرو ماتش اللي يبقى للتاريخ. اللي كيتفرج فالكورة ما عمرو ينساه.
كنتو خاصكم تربحو كولومبيا وفنفنس الوقت تشوفو اش واقع فماتش المانيا كوريا الجنوبية. كيفاش جيريتو هاد الستريس؟
الصراحة ما كناش علينا ستريس كبير فهاد الجانب. حنا داخلات لماتش كولومبيا. كنا مركزين غير عليه. لاعبينو غير هو. ما كناش مسوقات وقت الماتش لنتيجة ماتش المانيا. قبل الماتش كنا وجدنا باش نجيبو 3 نقاط. كان هادا هو الهدف اللي حطيناه. طبعا ربحنا 3 نقاط وقدرنا نتأهلو
كيفاش عشتي باش كلشي هدر عليك كونك اول لعابة دايرة الحجاب. باش رئيس الفيفا حتى هو كتب عليك ؟
تلقيت دعم كبير من ناس كثار رسلو لي ودعموني وكان حتى تضامن كبير. هاد الشي طبعا قوة دفعاتني نبدل جهد كبير فالماتشات اللي لعبتهم.