مدرب اللبؤات: خاصنا نربحو ما غاديش نتسنى ماتش كوريا ضد لالمان

"خاصنا نجيبو 3 نقاط فماتش غدا ضد كولومبيا. ما غاديش نتسنى نتيجة ماتش كوريا الجنوبية ضد المانيا" هادي هي الخلاصة اللي اكدها مدرب المنتخب المغربي لكرة القدم رينالد بيدروس فندوة صحافية دارها اليوم لاربعا 2 غشت 2023 بالملعب المستطيل بمدينة بورت الاسترالية. المدرب اضاف "ماشي طريقة مزيانة نتسناو الماتش لاخر. همنا ماتش المغرب. كلشي بيدينا حنا ونتسناو من بعد ايلى كان شي حظ باش نتأهلو".
المدرب قال 24 ساعة قبل الماتش الثالث من المجموعة الثامنة فمونديال استراليا ونيوزلندا باللي كلشي اللعابات واجدات وبللي ما كاينة حتى شي لعابة كتعاني من شي اصابة.
المدرب رد على عدد من الاسئلة٬ هدر على المونطال اللي بقى غادي فتصاعد فهاد المونديال. بعد الماتش الاول اللي ما كانوش اللعابات كلهم واجدات٬ دخل كلشي بالعقل وبالجسد فالمونديال.
مدرب اللبؤات يؤكد باللي الهدف اللي حطو بعد الهزيمة ضد المانيا هو يجمع 6 نقاط وباللي دابا جاب 3 وباقي ليه 3 غادي يقلب عليها فماتش غدا. واكد المدرب باللي دابا "كلشي فرحان باش يعطي اللي فجهدو فماتش غدا".