أول وزير يديرها.. الجدية فالسلكة: بايتاس رئيس الوفد الرسمي للحجاج المغاربة دار وليمة كبيرة بمناسبة الحج وجاوه العشرات من الجمال كادو مكتوب عليهم سميات ماليهم من برلمانيين وفاعلين

الوزير مصطفى بايتاس، الناطق الرسمي باسم الحكومة، دار وليمة كبيرة البارح السبت قدام دارو بسيدي إيفني بمناسبة الحج للي دار.
الوليمة أو السلكة (المعروف) لي نظم بايتاس، حجو ليها ناس من مختلف مناطق الصحراء وسوس، طبعا جاو بعض الأعيان وبرلمانيين ومنتخبين باش يباركو ليه فيما اختار البعض مقاطعة الحفل.
هادي أول مرة كنشوفو وزير ترأس وفد الحجاج الرسمي داير وليمة مور الحج.
الوليمة للي داير بايتاس حضر فيها تقريبا كثر من 1000 شخص، ولكن المثير فيها هو بعض المنتخبين والمقربين من بايتاس جابو ليه الجمال.
اييه برلمانيين بلا حشمة كتبو سمياتهم فالجمال بحال البرلماني احمد زاهو، لي كتب سميتو فالجمال لي قدم كادو، وعلى نفس النهج دارو الآخرين. حسب الصور لي توصلت بها "گود".
بايناس بهاد الحفل باغي يخلق تواصل مع الفاعلين فالمدينة والجهة، رغم أنه أقل تواصلا مع الساكنة وقليل فاش كيجي يفك معهم مشاكلهم التنموية. سيدي إيفني والنواحي كيعيش تهميش كبير وأزمة الماء والطرقان ممقاداش، أي واحد يمشي لإقليم سيدي غادي يعرف بلي بايتاس وغيرهم من المنتخبين مقدموش لهاد المنطقة سوى الوعود.
هاد العراضة لي داير بايتاس كتفكر الرأي العام فالحفل الباذخ لي دار محمد مبدع فعرس ولدو، غير الفرق بيناتهم واحد تباها بالغزلان ولاخر جاوه الجمال كادو فمشهد غريب.
يبدو أن بايتاس عندو مفهوم خاص للجدية، بانت عندو الجدية بزاف فتنظيم الولائم بحال هاد السلكة لي دار السبت.