ها حقيقة 600 مليون اللي عطاتها جهة طنجة للفرقة. رئيس الاتحاد ما فاهم والو وبان هاوي بزاف

باش استاقل محمد الشرقاوي من رئاسة اتحاد طنجة هادي ايام فالليل وعلى الفايسبوك ومن اسبانيا اللي كيدوز فيها عطلتو٬ كان دارها على قبال 600 مليون سنتيم عطاتها جهة طنجة تطوان الحسيمة.
هاد المنحة ما كتمشيش مباشرة للنادي. هادي كان دارها الرئيس الاسبق للجهة الياس العماري وبقات قاعدة فهاد الدعم. كتمشي للجامعة الملكية لكرة القدم.
الشرقاوي فاللول كيف قال لصحابو فجنوب اسبانيا وفق مصادر "كود"٬ فهم باللي هاد لفلوس غادية تعطيها للجامعة للعابة اللي عندهم مشاكل. السيد ما فاهم والو فالفرقة اللي كيسيرها.
لفلوس ما مشاتش للعابة. هاداك كريدي كانت خداتو الفرقة ايام الرئيس اللي سبقو من الجامعة. يعني غير كريدي ورجع واخا معطل ولكن رجع.
وفق مصادر "كود" هاد الشي ما كانش فراس حتى الوالي محمد امهيدية اللي تفاجأ بتبريرات استقالة رئيس طنجة.
الرئيس اللي كاين جنوب اسبانيا باش فهم هاد الشي عاد تراجع ودار فيها راه طلبني الوالي ووو. المشكلة ان رئيس ما عارفش اش فادارة فرقتو راه غير كيخربق.