شنو وقع فتيران فاس البارح؟.. العمدة البقالي ل"كود": بقا فيا الحال اللي تقطع الضو 15 دقيقة ماشي جوج أو ثلاثة دقايق وخا العطب التقني وارد والملعب ناقصاه بزاف ديال الأمور وحتى السبورة الإلكترونية مكانتش خدامة وها شكون يتحمل المسؤولية

عبر رئيس المجلس الجماعي لفاس، عبد السلام البقالي، عن أسفه للانقطاع المفاجئ للتيار الكهربائي على أرضية المركب الرياضي الكبير بالمدينة، وذلك خلال المباراة للي جمعات البارح المنتخب الوطني الأولمبي بنظيره البرازيلي.
وقال العمدة البقالي، في تصريح ل"كود"، أن "ما وقع أمس فايت واقع في عدد من التظاهرات الرياضية لكن اللي بقا فيا بزاف هو كيفاش تقطع الضو أكثر من 15 دقيقة".
وأضاف: "العطب التقني وارد يكون في أي محفل رياضي، لكن خاص تكون تدابير قبلية باش كيف توقع شي حاجة يكون تدخل بالزربة، وتكون دراسة مسبقة على يلا وقع بحال هادشي كيفاش نحلو المشكل حقاش يستحيل نساينو 15 دقيقة".
وحمل رئيس المجلس الجماعي المسؤولية المباشرة لهادشي اللي وقع للشركة الوطنية لإنجاز وتدبير المنشآت الرياضية"Sonarges"، موضحا بالقول: "دبا خاص بيان تكون فيه شروحات على كولشي باش الرأي العام يكون على بينة بهادشي".
ووضح العمدة أن العطب التقني كان ممكن معالجته في أقرب وقت، موضحا: "شخصياً أجهل لحدود الساعة السبب الحقيقي ودبا هاد الحادث رجع وطني وعالمي ماشي ديال فاس ويلا كان بفعل فاعل راه جريمة مستهدفة .
وعاد العمدة ديال فاس ليؤكد ل"كود" أنه خاص تكون تدابير لمعالجة أي عطب تقني محتمل في اللحظة الآنية وفي أقل وقت ممكن، مضيفا بالقول: "خاص يكون موطور جديد لحظة وقوع أي عطب، والملعب راه ناقصاه بزاف ديال الأمور بحال الأبواب ديالو...".
وفي سياق آخر، كشف البقالي أن الجامعة الملكية المغربية لكرة القدم غادي تسد المعلب نهاية الشهر الجاري باش تتدار ليه صيانة وتأهيل كبير حقاش غادي تلعب فيه ماتشات سنة 2025 ديال البطولة الإفريقية، بالإضافة إلى أحداث رياضية دولية، موضحا أن الحالة ديال الملعب مكانتش مقبولة".
رئيس المجلس الجماعي ذكر أيضا، أن السبورة الإلكترونية مكانتش خدامة، قبل أن يعبر مجددا عن أسفه الشديد لانقطاع الأضواء الكاشفة على أرضية الملعب الكبير بالمدينة، وقال: "التيران كان خاصو يكون مؤهل بمولد كهربائي يكون خدام بعد العطب التقني".