عادل رمزي: ها علاش كلست المطيع ودخلت حركاس وبو الفتح مزيان ولكن خاصو يرد البال وها شنو واقع لحركاس

كشف عادل رمزي مدرب الوداد الرياضي أنه دخل الكول المهدي مفتاح ضد شباب السوالم فالبطولة فبلاصة يوسف المطيع، ماشي حيث ما راضيش على الأخير، ولكن باش يشوف مستوى الحارسين بجوج، وأكد أن المدافع أمين أبو الفتح خاصو يولي يتحكم فراسو بعدما خدا حمرا مجانية فالماتش وأن حركاس كيوجد راسو باش يولي حتى هو يلعب.
وتحدث عادل رمزي بعد فوز الوداد الرياضي على السوالم بواحد لزيرو، وقال: "نورمالمون كتبدل الكارديان إذا ما كنتيش راضي عليه، ولكن ماشي على قبل هذا الشي كلست يوسف المطيع ضد شباب السوالم، حيث أنا مرتاح للعروض اللي قدم المطيع والمهدي مفتاح قدم عروض مزيانة فالتداريب".
وكمل رمزي: "حنا كنافسو على 4 الواجهات وخاصني نعطي الثقة حتى الحارس مفتاح، واختاريت نلعبو حيث الماتش اليوم كان مناسب بزاف حيث ما كانش الجمهور وخا هذا عامل ماشي فمصلحتنا، ولكن ما كانش الضغط عليه، وهكذا نشوف شنو عندهم بجوج وتبقى عندي فيهم الثقة، وأنا مرتاح حيث عندي جوج كوال مزيانين".
وحول طرد أمين بوالفتح بعدما دار حركة وهو كيحتفل بهدف الوداد على السوالم، كومونطا رمزي: "أنا فرحان للمردود ديال أمين أبو الفتح لا فالماتش اللي لعبنا ضد هافيا كونانكري فغينيا ولا فماتش اليوم ضد السوالم، وبخصوص الطرد ديالو راه خاصو يولي يكونترولي الأعصاب ديالو وهو لاعب مهم لينا فالدفاع ديالنا".
وبخصوص المدافع جمال حركاس وضح عادل رمزي الحالة ديالو وعلاش ما كيلعبش، وقال: "جمال حركاس كيطالب به الجمهور، أنا كنعرف القيمة ديالو وهو إضافة كبيرة لنا، جا عندنا بلا ما يكون مدرب مدة 15 يوم، خاصو يشارك وهو فاللياقة ديالو، كيتدرب مزيان بدنيا وحتى ذهنيا وغادي نحاولو نوجدوه فالوقت المناسب".