المغاربة محيحين فأوروبا.. العدلي وحارث كاينين مع أحسن 11 لعاب فاليوروبا ليك

أكدو اللاعبين المغاربة أن بلاصتهم كاينة فالبطولة الأوروبية، ومن بعدما عرفت مسابقة دوري أبطال أوروبا حضور مغربي قوي من خلال أشرف حكيمي نجم PSG الفرنسي، هذه المرة مسابقة اليوروبا ليك حتى هي حاضرين فيها المغاربة ومزيان.
وعرفت أحسن تشكيلة ديال الدورة الأولى من ليكروب د اليوروبا ليك، اختيار 2 لاعبين مغاربة مع 11 أحسن لاعب، وهما أمين العدلي المهاجم ديال باير ليفركوزن الألماني اللي خذا 9.6 النقاط، كأعلى تنقيط فالتشكيلة، والمتألق أمين حارث اللي خذا 8.7 النقاط.
وكيجي اختيار النجمين المغربيين أمين العدلي وأمين حارث فأحسن تشكيلة لليوروبا ليك، بعدما ماركا الأول هدف لباير ليفركوزن على هاكن السويدي وعطى أسيست ديال هدف آخر، وأمين حارث عطى 3 أسيست ديال 3 الأهداف فماتش أولمبيك مارسيليا مع أياكس امستردام.
وعرفت هذه الدورة من مسابقة اليوروبا ليك أيضا، تألق أيوب الكعبي اللي ماركا لأولمبياكوس اليوناني 2 بيوتا البارح على فرايبورك الألماني واخا الأخير هو اللي ربح بنتيجة 3 لجوج، وعودة عز الدين أوناحي يلعب أساسي مع أولمبيك مارسيليا ودار ماتش مزيان.