المواطنين الفرنسيين والزماكرية اكدو حبهم للمغرب فماتش PSG ونيس بتضامن كبير مع ضحايا الزلزال

خسرو باريس سان جرمان مع نيس اليوم الجمعة، فماتش مثير برسم الجولة 5 من منافسات البطولة الفرنسية، كان العنوان ديالو التضامن مع المغرب.
الماتش سالا بين باريس سان جرمان ونيس فتيران حديقة الامراء بنتيجة 3 الجوج، لمصلحة نيس، وأشرف حكيمي كان ورا أسيست الهدف الاول ديال PSG اللي ماركاه كيليان مبابي.
وعرف الماتش ملي بدا حتى سالا، واحد حملة تضامن كبيرة من طرف جماهير الفريقين، اللي هزو لافتات عبرو فيها على حبهم للمغرب وحزنهم على ضحايا زلزال الحوز.
وقبل من يبدا الماتش بين باريس سان جيرمان ونيس، دارو لاعبين الفريقين دقيقة صمت، وفريق نيس باع تونيات عليهم شعار التضامن مع المغرب بسبب فاجعة الحوز باغي يتبرع بفلوسها لضحايا الزلزال، و PSG دارو 1 دولار من كل تذكرة ديال الماتش لصالح ضحايا الفاجعة.